តម្បាញក្រមាអ្នកបន្ទាយអំពិល
ដោយ សូដា
អ្នកឧត្ដរមានជ័យជាអ្នកស្រុកខេត្តសង្កាត់មាត់ញកជាប់នឹងជួរភ្នំដងរែក ក្រៅពីនៅឆ្ងាយពីរាជធានីភ្នំពេញ អ្នកស្រុកនេះមានទំនៀមទម្លាប់ប្រពៃណីជាច្រើន ហើយភាគច្រើនក៏ខុសពីបណ្ដាខេត្តផ្សេងៗ តួយ៉ាងដូចជាការតម្បាញក្រមារបស់អ្នកស្រុកបន្ទាយអំពិល គឺមានលក្ខណៈខុសពីក្រមាផលិតនៅតំបន់ផ្សេងៗ។
ក្រមាគឺជាសំពត់ប្រពៃណីដ៏រឹងមាំរបស់ខ្មែរ ជាមួយការប្រើប្រាស់បានច្រើនបែប។ ក្រមាគេផលិតចេញពីសរសៃអំបោះ ឬក៏អំបោះសូត្រ ក្រមាប្រើប្រាស់បានច្រើនយ៉ាងដូចជូតមុខ បង់ក ជួតក្បាល អង្រឹងសម្រាប់ក្មេង ស្លៀកទាំងប្រុសស្រី ហើយនិងកូនក្មេង.........។ ក្រមាជាសំពត់អំបោះក្រឡាចត្រង្គខ្លីៗ ហើយមកពីពណ៌ប្រពៃណី ខៀវ ឬក្រហម។ វាជានិមិត្តសញ្ញាជាតិផងដែរ។ អ្នកឧត្តរមានជ័យកាលពីជំនាន់មុន ពួកគាត់ត្បាញក្រមាសម្រាប់ប្រើប្រាស់ ជាលក្ខណៈគ្រួសារ ជូនសាច់ញាតិពេលពិធីបុណ្យទានផ្សេងៗ ហើយផលិតចេញអំបោះសរសៃសូត្រ។ តែបច្ចុប្បន្ននេះមិនបានធ្វើចេញពីសូត្រដូចមុនទេ គឺពួកគាត់ត្បាញចេញពីអំបោះកែច្នៃរួចហើយពីរោងចក្រ (អំបោះថៃជាពិសេស)។ ការត្បាញនេះទៀតសោត ឃើញមានតែក្នុងទឹកដីស្រុកបន្ទាយអំពិល ជាពិសេស ក្នុងឃុំគោកមន តែម្ដងនាពេលបច្ចុប្បន្ន លក្ខណៈពិសេសនៃការត្បាញ របស់គាត់គឺមានតាំងពីដូនតារបស់គាត់ ហើយបង្រៀនតៗគ្នា ប៉ុន្តែមានការខុសប្លែកពីគេត្រង់ថា គេត្បាញជាក្រឡាចត្រង្គដូចគេដែរសម្រាប់ក្រមាធំ តែនៅចុងមុនដល់ជាយក្រមាទាំងសងខាង គឺពួកគាត់ត្បាញក្បាច់នានាដែលពួកគាត់ចេះ ដូចជាក្បាច់ទំពក់ ក្បាច់រូបសេះ ក្បាច់រូបដំរី....។ល។
ក្បាច់ខាងលើត្រូវប្រជាពលរដ្ឋក្នុងឃុំគោកមននៅតែផលិត តែក្បាច់រូបដំរីត្រូវបានមានចំនួនថយ ចុះនៃការផលិត ព្រោះអ្នកចេះមានចំនួនតិច។
តាមសំដី អ៊ំស្រី ពេជ្រ រៀម បានមានប្រសាសន៍ថា ក្បាច់មួយចំនួនមានការលំបាកក្នុងការបង្រៀននិងរៀនពីចាស់ជំនាន់មុនព្រោះ តែមានជំនឿ និង តំណមជាច្រើននៅពេលចាប់ផ្ដើមរៀន ។ ដូចជាក្បាច់រូបដំរី ត្រូវរៀបចំស្លាធម៌ និងតំណមមិនឲ្យមនុស្សអង្គុយនៅក្បាលកី....។ល។ នៅពេលដែរមិនអាចធ្វើតាមតំណមបាន អ្នករៀន អ្នកដែលចេះហើយ មានបញ្ហាជាច្រើនទាក់ទងនិងជីវិតរបស់គាត់ ដូចកន្លងមកតាមអ៊ំស្រី ធ្លាប់ជួប មាន ងងឹតភ្នែក បែកភ្នែក វៀចមាត់។
និយាយជារួមមកការត្បាញក្រមានេះត្រូវបានថយចំនួន ព្រោះតែគ្មានទីផ្សារ ពីនាពេលបច្ចុប្បន្ននេះ កាលពីមុនមាន អង្គការកុមារមេគង្គបានជួយរកទីផ្សារ ដោយទិញពីកន្លែងផលិត យកទៅលក់ក្នុងប្រទេសបារាំង។ ទន្ទឹមនឹងនេះ ដើម្បីឲ្យតម្បាញក្រមាទាំងនេះ មានមុខមាត់នៅទីផ្សារ ហើយនិងបង្កើនផលិតផលក្នុងស្រុក ខ្ញុំសូមអំពាវនាវដល់អាជ្ញាធរដែរពាក់ព័ន្ធក្នុងការតាំងពិព័រណ៍ខេត្តមួយផលិតផលមួយ យកផលិតផលនេះមកដាក់តាំងពិព័រណ៍ផង និងជាការផ្សព្វផ្សាយដល់អតិថិជន ហើយស្នាដៃទាំងអស់នេះក៏មិនបាត់បង់នៅពេលខាងមុខដែរ៕៚
