រៀបរៀងដោយ ស៊ី សាឡែន ធ្វើនៅថ្ងៃទី០៦ ខែ មករា ឆ្នាំ ២០១៣ លេខ០១៣៧
មើលន៎ឯនាយ គេដើរទស្សទាយ
ស្ពាយក្បួនតម្រា (១) គេថែមកត់ទុក
ទៅមុខយាត្រា ប្រើដោយបញ្ញា
វាចារសមសួន ។
ពេលឮឈ្មោះខ្មែរ ពាក្យគេតែងតែ
ពោលថាបងប្អូន គេចាំប្រវត្តិ
គេស្ទាត់ទាំងក្បួន ខ្មែរតែងភ្លេចខ្លួន
ក្បួនគេទីទៃ ។
គេអាងសាច់ដុំ ឃើញមាឌគេធំ
អាងពាក្យបំភ្លៃ គេឃើញយើងតូច
ប្រដូចសត្វចៃ គេគូសនឹងដៃ
តែងលុបនឹងជើង ។ (២)
គេមានមហិច្ឆតា យកខ្មែរខេមរា
ទីបង្កាត់ភ្លើង គេស្រែកខ្លាំងៗ
មិនតតាំងយើង ទ័ពគេឈរជើង
ក្នុងដីសីមា។ (៣)
នេះគេក្បួនច្បាប់ គេមិនដែលត្រាប់
អ្វីដែលគេថា ផ្ទុយពាក្យចារចុះ
ដែលស្មោះបោះត្រា ចូរខ្មែរខេមរា
មានការប្រៀបប្រុង ។
គ្រប់ផ្នែកវិស័យ ទោះតិចតូចក្តី
គេគន់សំឡឹង មិនចង់ឃើញខ្មែរ
ឆ្លៀតស្នេហ៍ពង្រឹង វប្បធម៌រីករឹង
ក្រៅក្នុងប្រទេស ។
កូនខ្មែរប្រុសស្រី គួរតែវាងវៃ
មិនត្រូវប្រហែស ត្រេចចរកត់តា្រ
បញ្ញាអ្នកទេស ញាណដោយតម្រេះ
ហើយឃ្លាំរំពៃ ។
ដើរតាមផ្លូវជើង ចក្ខុជាភ្លើង
ឆ្លុះបំភ្លឺព្រៃ សោតៈស្តាប់បាន
វិញ្ញាណថ្លាថ្លៃ ចេញពីហរទ័យ
ដោយគន្លងធម៌ ។
ពូជខ្មែរមានសីល ជាតិគេក្រវែល
តាមចោះយកជ័រ ប្រាថ្នាប៉ុនប៉ង
ចំឡងផ្សាំពណ៌ ចង់ឲ្យខ្មែរញ័រ
ឆ្លៀតចូលចាក់ថ្នាំ ។
នេះគេគំនឹត ថ្វីយើងមិនគិត
ក៏ត្រូវមានកម្ម យើងស្រួលដំណេក
គេភ្នែករកាំ ព្រោះខ្មែរកេរដាំ
ចាក់គ្រឹះត្រៀបត្រា ។
រាល់ថ្ងៃគេស្ទង់ ចាត់ចែងគូរប្លង់
ច្រើនថ្មីផែនការ បើខ្មែរបានសុខ
គេមុខក្តៅផ្សា ខ្មែរសូន្យសាវតា
វាសនាគេខ្ពស់ ។
គេផ្លាស់ស្បៃថ្មី លេចពណ៌ស្កឹមស្កៃ
ហាក់ថ្កើងកេរ្តិ៍ឈ្មោះ ប្រវត្តិបរិសុទ្ធ
គេចផុតទុរយស ជាតិមិនពាល់ប៉ះ (៤)
ពូជចោរអប្រិយ ។
យើងបានដឹងច្បាស់ នាមខ្មែរគេផ្លាស់
កាត់ផ្តាច់និស្ស័យ គ្រប់ឈ្មោះខេត្តឃុំ
លួចហុំយកដី អក្ខរាក្រឡៃ
លេចថ្មីប្រវត្តិ ។
ដែនទឹកដីខ្មែរ គេប្រៀបដូចរ៉ែ
ពេញដោយឳសថ៌ គេទារចូលឆ្នៃ
លូកដៃវាស់កាត់ ដោយចិត្តមធ្យ័ត
ងងល់ហ្មងមោះ ។
អ្វីជាទ្រព្យយើង គេតាមរករឿង
មិនដែលបង់បោះ ទាមទារចំណែក
បំបែកដីកោះ បាតអាងឯណោះ
ច្រោះបូមឈូឆរ ។
តាមផ្លូវសេដ្ឋកិច្ច គេតាមពន្លិច
ច្របាច់ជាន់ក គេបានចំណែក
ដឹករែកបន្ត ម្ចាស់សល់បបរ
កំដរជីវិត ។
វិស័យសេដ្ឋកិច្ច គេប្រើស្នៀតល្បិច
តាមគាបរួតរឹត ក្បួនបង្ខះទុន
ប្រើឈ្នុនបើកបិទ ខ្មែរទាល់គំនឹត
លែងគឹតថោកថ្លៃ។
តាមឈ្នាន់សេដ្ឋកិច្ច គេចាយទុនតិច
បានច្រើនកម្រៃ កេងដូរដោះថោក
ផ្សំបោករាល់ថ្ងៃ ទឹកមាត់គេប្រៃ
ផ្តល់ន័យខ្លឹមសារ ។
គេមានទុនធំ ទឹកដីជាយព្រំ
គេជួលប្រើការ បានទិញធ្វើម្ចាស់
ចំក្រាស់ព្រឹក្សា ម៉ីនសែនហិកតា
ដាំបង្កើនទុន ។
បែបគេសេដ្ឋកិច្ច ខ្មែរសល់បង្វិច
ជាតិគេកើនធន ចិត្តគេជាម្ចាស់
មិនខ្វះទេពមន្ត ផលកើនពេកពន់
កើបទុនបន្ថែម ។
ចរន្តសេដ្ឋកិច្ច ខ្មែរត្រូវរិលរេច
ព្រោះច្រើនអ្នកក្លែម ចិត្តជ្រួលរំភើប
ចំពើបបង្អែម អស់គេបោះថែម
ភ្លេចទិសតំបន់ ។
គេប្រើបញ្ញា ការពារត្រួតត្រា
គ្រប់គ្រងចរន្ត សេដ្ឋកិច្ចយោធា
គង្គាប្រព័ន្ធ គេមិនរួសរាន់
កាត់ផ្តាច់សង្ខារ ។
ប្រៀបបានដើមជ្រៃ ដុះលាស់ធំថ្មី
ផ្ញើលើរុក្ខា ស្រូបយកជីរជាតិ
កៀបត្បៀតរូបា ផ្តាច់ទាល់មរណា
សល់សារជាតិជ្រៃ ។
មើលគេឯនាយ គឹតឲ្យធ្លុះធ្លាយ
ចាប់គេសំដី ប្រើញ្ញាណទាំងប្រាំ
សកម្មព្រួតដៃ លើកស្ទួយកែឆ្នៃ
ជាតិដែលរងគ្រោះ ។(៥)
បើពុំនោះសោត កុំបើកក្រឡោត
ភ្នែកមាត់បន្ទោស ជាតិយើងត្រូវការ
ចេស្តាធនមនុស្ស ផុសដោយសន្ទុះ
អ្នកជាតិនិយម ។
កាលបានយល់ច្បាស់ ទឹកចិត្តមិនខះ
មូលមកប្រគុំ ស្ម័គ្រចូលលះបង់
ទ្រទ្រង់ទ្រនំ តាមផ្នែកតាមក្រុម
កុំបីខកខាន ។
បងប្អូនរួមជាតិ ចូរចាំខ្មីឃ្មាត
ដក់ជាប់គ្រប់ប្រាណ ជាតិយើងផុតទុក្ខ
ទៅមុខសាន្តត្រាណ អាស្រ័យកល្យាន
ខ្មែររួមសាមគ្គី ៕
ពាក្យពន្យល់៖
(១) ក្បួនតម្រាគេ (២) មានពាក្យចម្លងខ្លះ
(៣) ដីខ្មែរសីមា (៤) ជាតិរបស់គេ (៥) ជាតិខ្មែរខេមរា