ដោយ ៖ សុខ ខេមរា
ថ្ងៃទី 22-03-2012 ម៉ោង 09:40:51
ខេត្ដឧត្ដរមានជ័យ ៖ សកម្មភាពដឹកជញ្ជូនឈើកំពុងកើតមានយ៉ាងពេញបន្ទុកនៅក្នុងទឹកដីខេត្ដឧត្ដរមានជ័យ មានទាំងក្រុមហ៊ុនព្រៃសម្បទានសេដ្ឋកិច្ច និងក្រុមឈ្មួញល្មើសច្បាប់ក្នុងនោះមានក្រុមហ៊ុនដែលមានព្រៃសម្បទានសេដ្ឋកិច្ច ក៏បានលួចបង្កប់ដឹកឈើគ្រញូងនិងប្រមូលទិញឈើគ្រញូងរហូតដល់ធ្វើឱ្យប្រជាពលរដ្ឋមួយចំនួនបង្ខំចិត្ដចូលកាប់ និងអូសឈើក្នុងទឹកដីថៃ យកមកលក់ឱ្យឈ្មួញ ឬស៊ីឈ្នួលអូសឈើគ្រញូងនេះជា ដើមងាយនឹងរងគ្រោះដោយការបាញ់ប្រហារផងដែរពីទាហានថៃនោះ ។
គេបានរាយការណ៍មកថា ក្រុមហ៊ុនទំរីង ដាតា កំពុងតែប្រមូលទិញឈើគ្រញូង និងដឹកជញ្ជូនឈើគ្រញូងយ៉ាងអនាធិបតេយ្យក្រោមក្រសែភ្នែកសមត្ថកិច្ចនិងជំនាញរដ្ឋបាលព្រៃឈើក្នុងខេត្ដនេះ ។
ជាទូទៅគេបានឃើញទីតាំងក្រុមហ៊ុន ទំរីង ដាតា ដែលស្ថិតនៅភូមិអណ្ដូង៣ ឃុំ-ស្រុកអន្លង់វែង ខេត្ដឧត្ដរមានជ័យ បានចាំប្រមូលទិញឈើពីក្រុមឈ្មួញដឹកជញ្ជូនជាម៉ូតូ ជាឡានកាមរីកែច្នៃ ទួរីស រួចហើយក្រុមហ៊ុនទំរីងដាតា បានដឹកជញ្ជូនឈើគ្រញូងទាំងនោះតាមរយៈឡានកូរ៉េ២តោនកន្លះចេញពីទីតាំងក្រុមហ៊ុន ឆ្ពោះទៅកាន់ខេត្ដកំពង់ចាម ។
កាលពីថ្ងៃទី១៩ ខែមីនា ឆ្នាំ២០១២ ក្រុមហ៊ុនទំរីង ដាតា បានដឹកឈើគ្រញូងតាមឡានកូរ៉េ២តោនកន្លះ ប៉ុន្ដែមានអ្នករត់ការសម្រាប់បែងចែកប្រាក់ដល់សមត្ថកិច្ច ដែលមានឈ្មោះបូរ ជាអ្នកចេញមុខរត់ការនិងមានឯកសណ្ឋានជាយោធា មានកាំភ្លើងខ្លី និងឡានកាមរី ឆ្លាមពណ៌ស្ករ សម្រាប់ជាមធ្យោបាយរត់ការនោះ ។
លោកទៀង ដាវីដ នាយខណ្ឌរដ្ឋបាលព្រៃឈើខេត្ដឧត្ដរមានជ័យ ហាក់ដូចជាមមាញឹកផងដែរក្នុងការទទួលផលប្រយោជន៍ពីបទល្មើសព្រៃឈើដែលកំពុងកើតមាននៅក្នុងខេត្ដឧត្ដរមានជ័យនេះ មិនតែប៉ុណ្ណោះឈ្មួញឈើមួយចំនួនបានស្គាល់អំពីទឹកចិត្ដរបស់គាត់ច្បាស់ក្នុងការទទួលផលប្រយោជន៍ពីពួកគេដែលបានដឹកជញ្ជូនឈើល្មើសច្បាប់ ។
កន្លងទៅ ក្រុមហ៊ុនទំរីង ដាតា តែង តែប្រមូលទិញឈើពីប៉ែកអូរស្មាច់ ស្រុកអន្លង់វែង, ស្រុកត្រញំងប្រាសាទ និងពីចំណុចទំនប់ដាច់ ហើយមួយចំនួនទៀត ក៏បានប្រមូលទិញផងដែរពីខេត្ដព្រះវិហារយកមកស្ដុកទុកនៅទីតាំងក្រុមហ៊ុនរបស់ខ្លួនជ្រកក្រោមឈើមានច្បាប់ ដែលចេញពីព្រៃសម្បទានសេដ្ឋកិច្ចរបស់ខ្លួននោះ ។
ពាក់ព័ន្ធនឹងករណីក្រុមហ៊ុនទំរីង ដាតា ដឹកជញ្ជូនឈើគ្រញូងដែលមកពីការប្រមូលទិញពីឈ្មួញ និងប្រជាពលរដ្ឋរហូតដល់អ្នករត់ការឱ្យក្រុមហ៊ុននេះចំណាយប្រាក់ទៅលើសមត្ថកិច្ច និងជំនាញរដ្ឋបាល ព្រៃឈើបែបអនាធិបតេយ្យនេះលោក ទៀង ដាវីដ នាយខណ្ឌរដ្ឋបាលព្រៃឈើ ខេត្ដឧត្ដរមានជ័យបានប្រាប់នគរវត្ដតាមទូរស័ព្ទថា “ច្បាប់ណាដឹកឈើគ្រញូងមិនបាន” រួចក៏បិទទូរស័ព្ទ ។
ថ្មីៗនេះក៏មានការរិះគន់ផងដែរពីក្នុងស្រុកអន្លង់វែង បន្ទាប់ពីខាងជំនាញរដ្ឋបាលព្រៃឈើតែងតែធ្វើទុក្ខបុកម្នេញ គាបសង្កត់ និងបង្ខំឱ្យប្រជាពលរដ្ឋដឹកវល្លិផ្ដៅបន្ដិចបន្ដួច ទៅលក់នៅទឹកដីថៃតាមច្រកជាំ-សាង៉ាំ រងនូវការចាប់ ក៏ដូចជាតម្រូវឱ្យបង់ប្រាក់ទៅតាមទំនើងចិត្ដ ហើយបទល្មើសដឹកជញ្ជូនឈើគ្រញូង ក៏ដូចជាការប្រមូលទិញឈើនៅក្នុងស្រុកអន្លង់វែង, ស្រុកត្រពាំងប្រាសាទ បែរជាអស់លោកជំនាញរដ្ឋបាលព្រៃឈើសុខចិត្ដបិទភ្នែកធ្វើជាដេកលក់មើលមិនឃើញ ។
កាលពីព្រឹកថ្ងៃទី២១ ខែមីនា ឆ្នាំ២០១២ ជំនាញរដ្ឋបាលព្រៃឈើស្រុកអន្លង់វែង បានចាប់ផ្ដៅរបស់ប្រជាពលរដ្ឋ យកមកទុកនៅទីស្នាក់ការរបស់ខ្លួន រួចហើយបង្ខំឱ្យប្រជាពលរដ្ឋយកប្រាក់ទៅដោះស្រាយដែលជាអំពើពុករលួយ និងខ្វះភាពទទួលខុសត្រូវចំពោះការបង្ក្រាបបទល្មើសព្រៃឈើ ដែលកំពុងកើតមានពេញបន្ទុកនៅក្នុងខេត្ដឧត្ដរមានជ័យនេះ ៕
