សមាគមនិស្សិតឧត្តរមានជ័យ: ដើមចេក

Source from :http://www.bijlmakers.com/fruits/banana.htm

យើងដឹងហើយថា នៅលើលោកយើងនេះក៏ដូចជានៅក្នុងប្រទេសកម្ពុជាយើងទាំងមូល គឺមានដើមរុក្ខជាតិដែលមានប្រយោជន៍ច្រើនណាស់ មិនថាដើមរឹងតាន់ឬ ដើមស្រួយភុយនោះទេ គឺសុទ្ធតែមានប្រយោជន៍ទាំងអស់ ជាពិសេសគឺដើមចេក ។ ដើមចេកគឺជារុក្ខជាតិម្យ៉ាងដែលនៅក្នុងដើមវាពោពេញទៅដោយទឹក និងមានសំបកច្រើនជាន់ រុក្ខជាតិប្រភេទនេះគឺច្រើនដុះនៅលើដីដែលមានសំនើមសមគួរ ហើយត្រជាក់ ប៉ុន្តែបើយើងដាំដើមនេះនៅឆ្ងាយដាច់ពីគ្នាក៏គ្មានផលច្រើនដែរ ពីព្រោះវាត្រូវការដុះជាគុម្ពធំៗ ហើយជាប់គ្នាទៀត បើយើងដាំវាដាច់ឆ្ងាយពីគ្នា វាអាចដុះមិនល្អ លូតលាស់មិនល្អ ហើយមានដើមតូច ចំនែកផ្លែវាក៏ទទួលបានផលមិនល្អដែរ ។ ជាការពិតណាស់រុក្ខជាតិប្រភេទនេះ គឺផ្ដល់អត្ថប្រយោជន៍ច្រើនណាស់ដល់ប្រជាជនខ្មែរយើង ដូចជាៈ ស្លឹកវាយើងអាចមកធ្វើជាសំបកសម្រាប់វិចនំ នំអន្សម និងជាពិសេសយើងតែងឃើញប្រជាជនដែលរស់នៅឯជនបទ ពួកគាត់តែងយកស្លឹកនេះយកមកវិចខ្ចប់បាយឬ ម្ហូបផ្សេងៗទៀតសម្រាប់ដាក់យកទៅស្រែចំការជាដើម ចំនែកដើមវាវិញ ក៏មានប្រយោជន៍មិនចាញ់ស្លឹកដែរ គឺយើងអាចយកដើមវាមកធ្វើជាអាហារ សម្រាប់សត្វ ដូចជាៈ ជ្រូក គោ និងសត្វផ្សេងៗទៀតដែលស៊ីដើមចេកជាអាហារ ជាពិសេសយើងក៏អាចយកដើមចេកមកធ្វើជាអន្លក់ក៏បាន ហើយឆ្ងាញ់ទៀត ដោយយើងយកវាមកជ្រៀក ដើម្បីយកបណ្ដូលខ្ចីមកធ្វើជាអន្លក់ និងធ្វើសម្លរម្ជូរក៏បាន។ ចំនែកផ្លែវាវិញក៏មានប្រយោជន៍ ច្រើនមិនចាញ់ដើម និងស្លឹកដែរ ហើយផ្លែនេះមានប្រយោជន៍ជាងគេ ពីព្រោះពេលចេកវាចេញត្រយោងមកយើងអាចយកវាមកធ្វើអន្លក់ និងធ្វើជាបន្លែយ៉ាងពិសេស ពេលចេញជាផ្លែចេកហើយប៉ុន្តែវានៅតូចខ្ចីយើងក៏អាចយកវាធ្វើជាបន្លែសម្រាប់សម្លផ្សេងៗដូចជាសម្លកកូរជាដើម ហើយជាពិសេសអ្វីយើងទន្ទឹងរងចាំជាយូពេលមកហើយនោះគឺនៅពេលដែលវាមានអាយុកាលចាស់ នៅពេលនោះយើងអាចយកទៅទុកបន្ទុំ ដើម្បីឲ្យវាទុំពេញលក្ខណៈនោះទើបយើងអាចយកមកបរិភោគដែលមានរសជាតិយ៉ាងឆ្ងាញ់ និងគេយកវាទៅធ្វើនំ នំអន្សម បង្អែមចេកខ្ទិះ និងយកទៅធ្វើនំផ្សេងៗច្រើនទៀត។ ម្យ៉ាងទៀតផ្លែចេកទុំនេះ យើងអាចយកវាមកធ្វើជាដង្វាយផ្សេងៗនៅក្នុងពិធីបុណ្យដូចជា ពិធីបុណ្យចូលឆ្នាំខ្មែរ និងពិធីបុណ្យសែនព្រេនផ្សេងៗទៀត ជាពិសេសយើងក៏អាចយកផ្លែចេកទុំនេះទៅលក់នៅទីផ្សារក៏បានដែរ។ តាមការបកស្រាយខាងលើនេះ យើងឃើញថារុក្ខជាតិប្រភេទនេះមានប្រយោជន៍ច្រើនណាស់សម្រាប់ប្រជាជនខ្មែរយើង ដូចនេះយើងត្រូវរួមគ្នាថែរក្សា និងដាំដើមរុក្ខជាតិប្រភេទនេះ(ដើមចេក)ឲ្យបានច្រើន ដើម្បីទុកសម្រាប់ធ្វើផលប្រយោជន៍ដល់ខ្លួនឯង ក៏ដូចជាសង្គមយើងទាំងមូលផងដែរ ៕ ស្ងាម ក្រឹម

Monday, January 14, 2013

ដើម​ចេក

ដើមចេក