2012-02-06
វិទ្យុអាស៊ីសេរី
សាលាបឋមសិក្សាមួយខ្នង នៅភូមិអូរបាត់ដាវ ឃុំបន្សាយរាក់ ក្រុងសំរោង ខេត្តឧត្តរមានជ័យ ជាសាលារៀនមានការខ្វះខាត និងប្លែក។
RFA/Keo Nimol
ទិដ្ឋភាពក្នុងថ្នាក់រៀននៃសាលាបឋមសិក្សាអូរបាត់ដាវ កាលពីថ្ងៃទី៥ កុម្ភៈ ២០១២
លោកគ្រូ អ៊ុយ លីណា ជាគ្រូបង្រៀនតែម្នាក់គត់ នៅសាលាបឋមសិក្សាអូរបាត់ដាវ។ សាលារៀននោះ បើមិនមានស្លាកជាអក្សរដាក់ថា សាលារៀនទេ ប្រហែលជាអ្នកធ្វើដំណើរតាមដងផ្លូវមកពីកន្លែងឆ្ងាយមិនដឹងថា មានសាលារៀនឡើយ។
សាលាបឋមសិក្សាអូរបាត់ដាវ ជារោងឈើប្រក់ស្បូវមួយ មានបណ្ដោយប្រមាណ ២៥ម៉ែត្រ ទទឹងប្រហែល ១០ម៉ែត្រ។ សាលានេះស្ថិតនៅតាមដងផ្លូវពីក្រុងសំរោង ទៅកាន់ប្រាសាទតាក្របី និងតាមាន់។
លោកគ្រូ អ៊ុយ លីណា ដែលមានអាយុប្រមាណ ២៥ឆ្នាំ មានទឹកមុខញញឹម បានមានប្រសាសន៍ប្រាប់អ្នកយកព័ត៌មានវិទ្យុអាស៊ីសេរីថា លោកស្វាគមន៍ភ្ញៀវដែលបានមកដល់សាលាបឋមសិក្សាអូរបាត់ដាវ។ ប៉ុន្តែលោកគ្រូបានសុំទោស ដោយសារសាលារៀននេះ មានតែថ្នាក់មួយ មានដំបូលប្រក់ស្បូវ ហើយមិនមានកៅអីសម្រាប់ទទួលភ្ញៀវ ដែលមកមើលសាលានេះឡើយ។ ពីព្រោះលោកគ្រូ លីណា ក៏មិនមានកៅអីអង្គុយដែរ។ ហើយរឿងគ្មានកៅអីសម្រាប់គ្រូអង្គុយបង្រៀននេះ មិនមែនទើបតែកើតឡើងទេ។
សាលាបឋមសិក្សាអូរបាត់ដាវស្ថិតនៅតាមដងផ្លូវពីក្រុងសំរោង ទៅកាន់ប្រាសាទតាក្របី និងតាមាន់ (RFA/Keo Nimol)
រឿងគ្រូគ្មានកៅអីអង្គុយនោះ វាជាបញ្ហាមួយទៅហើយ តែរឿងមួយទៀតនោះ គឺកៅអីកូនសិស្សចំនួន ២ជួរ ដែលមានកុមារា កុមារី ប្រមាណ ៥០នាក់អង្គុយរៀននោះ ក៏មិនមានភាពមាំទាំដែរ។ គឺកៅអីជាជួរនោះរង្គើញ័រ ពុំមានភាពរឹងមាំឡើយ។
ប៉ុន្តែទោះបីសាលារៀនមានតែ ១ថ្នាក់ អត់កៅអីគ្រូអង្គុយនោះក៏ដោយ ក៏លោកគ្រូ លីណា មានទឹកមុខរាក់ទាក់រៀបរាប់ឲ្យដឹងថា សាលាបឋមសិក្សាអូរបាត់ដាវនេះ មានសិស្សមករៀន ២វេន។ វេនពេលព្រឹក គឺបង្រៀនសិស្សថ្នាក់ទី១ ចាប់ពីម៉ោង ៧ព្រឹក ដល់ម៉ោង ១១ថ្ងៃត្រង់។ វេនទី២ ចាប់ពីម៉ោង ១រសៀល ដល់ល្ងាចម៉ោង៥។ ចំពោះវេនល្ងាច គឺសិស្សថ្នាក់ទី២ និងទី៣ រៀនជាមួយគ្នាក្រោមដំបូលថ្នាក់តែមួយ។ មានក្ដារខៀនបង្រៀន២ និងមានលោកគ្រូបង្រៀនតែម្នាក់។
វាពិតជាគួរឲ្យចម្លែកមែន ដោយសារខេត្តឧត្តរមានជ័យ មានដើមឈើជាច្រើនដុះកើតជាព្រៃឈើ តែរកឈើមួយដុំធ្វើកៅអីឲ្យគ្រូបង្រៀនម្នាក់អង្គុយបង្រៀនសិស្សជិត ១៥០នាក់ ក្នុងមួយថ្ងៃមិនបាន?
ក្រៅពីសាលារៀនមានថ្នាក់តែ១ ហើយមានកូនសិស្ស ២វេនរៀនជាមួយលាយគ្នានោះ សាលារៀនអូរបាត់ដាវ មានជញ្ជាំងតែ ៣ជ្រុងប៉ុណ្ណោះ។ លោកគ្រូ លីណា បានឲ្យដឹងថា ថ្នាក់រៀននេះ បើកាលណាមានភ្លៀង គឺសាចចូលថ្នាក់ កូនសិស្សដែលអង្គុយក្បែរកន្លែងគ្មានជញ្ជាំងបាំង ត្រូវតែទទឹកទឹកភ្លៀង។ ក្រៅទឹកភ្លៀងអាចសាចបាចចូលយ៉ាងងាយនោះ សាលាបឋមសិក្សាអូរបាត់ដាវងាយឆាបឆេះបាត់រូបរាងដោយងាយទៀតផង។ ពីព្រោះសាលារៀននោះ ធ្វើពីឈើប្រក់ស្បូវដូចទ្រុងមាន់ខ្នាតធំមួយប៉ុណ្ណោះ។
ប៉ុន្តែទោះបីសាលារៀនមានសភាពដូចរោងឈើធ្វើពីស្បូវ ប៉ុន្តែលោកគ្រូ លីណា បានតុបតែងថ្នាក់រៀនខាងក្នុង មានកាលវិភាគ រូបគំនូរបង្រៀនបានយ៉ាងសមរម្យ និងមានរបៀបរៀបរយ។
លោកគ្រូបានមានប្រសាសន៍ឲ្យដឹងថា លោកគ្រូបង្រៀននៅសាលានេះបានមួយឆ្នាំហើយ។ លោកគ្រូចង់ផ្តល់ចំណេះដឹងឲ្យកុមារតូចៗ នៅក្នុងភូមិឲ្យចេះអក្សរ និងលេខនព្វន្ត។ លោកគ្រូចង់បានថ្នាក់រៀនមួយ ឲ្យបានសមរម្យសម្រាប់សិស្សអង្គុយរៀន។ តែមិនដឹងពេលណាមានថ្នាក់រៀនតាមនិយាមគរុកោសល្យអប់រំតម្រូវឲ្យមាននោះកើតមានឡើយ។
កុមារាមួយរូបជាសិស្សថ្នាក់ទី៣ ឈ្មោះ ឆា នន់ បានឲ្យដឹងថា ខ្លួនក៏ចង់បានសាលារៀនមួយ និងថ្នាក់រៀនមួយសមរម្យដូចធ្លាប់បានឃើញក្នុងទូរទស្សន៍បញ្ចាំងដែរ។
លោក អ៊ឹង ប៉ូរ៉ាត់ ជានាយកមន្ទីរអប់រំខេត្តឧត្តរមានជ័យ។ ទាក់ទងការខ្វះខាតរបស់សាលាបឋមសិក្សាអូរបាត់ដាវនេះ លោកនាយកមន្ទីរអប់រំខេត្តឧត្តរមានជ័យបានមានប្រសាសន៍ថា រដ្ឋមិនទាន់មានគម្រោងសាងសង់សាលានៅឡើយទេ។ ដូច្នេះហើយបានជាសាលាមានការខ្វះខាត។
ចំពោះការឲ្យមានការរៀនគួបរវាងសិស្សថ្នាក់ទី២ ជាមួយសិស្សថ្នាក់ទី៣នោះ លោកនាយកមន្ទីរអប់រំខេត្ត បានមានប្រសាសន៍ថា ដោយសារសិស្សមានចំនួនតិច ទើបបានជាអនុញ្ញាតឲ្យមានការបង្រៀនគួបនោះ បើទោះបីជាដឹងថា មានការប៉ះពាល់មិនត្រូវតាមក្បួនគរុកោសល្យក៏ដោយ។
ប៉ុន្តែទោះបីជាយ៉ាងណា លោកនាយកមន្ទីរអប់រំខេត្តសន្យាថា នឹងបញ្ជូនក្រុមអធិការកិច្ចឲ្យចុះទៅពិនិត្យមើលសាលាបឋមសិក្សាអូរបាត់ដាវនោះ។
លោក រ៉ុង ឈន់ ប្រធានសមាគមគ្រូបង្រៀនឯករាជកម្ពុជាបានយោបល់ថា ការបង្រៀនសិស្សនៅក្នុងថ្នាក់២ កម្រិតខុសគ្នា ក្នុងថ្នាក់តែមួយ មិនមែនជាការល្អឡើយ គេហៅថាការបង្រៀនគួប។ ហើយការបង្រៀនគួបនេះ ដោយសារនៅតាមជនបទមានការខ្វះគ្រូបង្រៀន និងថ្នាក់រៀន។
របាយការណ៍របស់ក្រសួងអប់រំ យុវជន និងកីឡា ឆ្នាំ២០១០ បានឲ្យដឹងថា នៅខេត្តឧត្តរមានជ័យ មានសាលាបឋមសិក្សាចំនួន១៧០ ចែកជាថ្នាក់រៀនមានចំនួន ១២០៥ថ្នាក់ មានសិស្សចំនួន ៣៧.២៥៣នាក់ គ្រូបង្រៀនសរុបចំនួន ៩០៨នាក់៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។