ថ្មប្រឹង

(បទពាក្យ៧ ស្មូត្របែបកុមារបាល)

ថ្មប្រឹង ខាំមាត់ អត់មិនថ្ងូរ

ទឹកភ្នែកជ្រែកហូរ មិនជេរជាង

ទ្រាំឲ្យដាប់ឆ្លាក់ ឆ្លាស់រូបរាង

រូងខួងផ្អងផ្អៀង កៀងឲ្យល្អ ។

ថ្មប្រឹង សម្លឹង ស្លឹងស្លក់ភ្នែក

មិនមានពេលដេក រែកមិនត

ប្រឹងសើចញញឹម ដាក់ទេចរណ៍

ហៅចូលបន្ត ចរបណ្តាក់ ។

​ថ្មប្រឹង ជ្រែងឈរ បង្ហាញប្រាង្គ

វប្បធម៌តំណាង តាងសស្រាក់

ល្វតល្វន់ទន់ភ្លន់ ធន់អនគ្ឃ

ខេមរាសិល្បៈ ឆ្លាក់ប្រណីត ។

ថ្មប្រឹង មិនរា ទោះក្តៅហែង

ភ្លៀងផ្គរក្តែងៗ ផ្សែងវិបរិត

ឈឺគ្រុនរងារ ទុក្ខរួបរិត

ទោះក្ស័យជីវិត ពិតថ្មព្រម ។

ថ្មប្រឹង មិនខឹង នឹងជនខ្លៅ

មួយក្តាប់តូចខ្មៅ យល់មិនល្មម

លបលួចអាដាប់ ថ្មខូងស្គម

រូបកាយទ្រុឌទ្រោម ធ្លាក់ពិការ ។

ថ្មប្រឹង បង្ហាញ អន្តរជាតិ

ផ្តល់សារ សាសាន៍ទៀត ជ្រៀតខេមរា

មានគោលវប្បធម៌ ធន់ថ្លៃថ្លា

ចង់ចូលទស្សនា ខ្មែរបុរី ។

ថ្មប្រឹង ម្លឹងហើយ ឳ!កូនខ្មែរ

កុំឡើយភ្លេចថែ ស្នេហ៍ដែនដី

វប្បធម៌សិល្បៈ ប្រពៃណី

ស្ទួយខ្មែរបុរី ល្បីថ្កើងថ្កាន ៕

ភ្នំពេញ,ថ្ងៃទី០៥ ខែកក្កដា ឆ្នាំ ២០០៩

និស្សិត ទឹម​ រ័ត្នម្នី ដែលបាន​ទទួលមរណភាព នៅ​កោះពេជ្រ កាលពី​ឆ្នាំ​២០១០