ឧត្តរមានជ័យ
៖ កាលពីវេលាម៉ោង៧និង២៥នាទី ព្រឹកថ្ងៃទី ៧ ខែឧសភា
ឆ្នាំ២០១២នៅផ្នែករដ្ឋបាលព្រៃឈើអន្លង់វែងបានធ្វើការបូកសរុបលទ្ធផល
ស្ដីពីការទប់ស្កាត់ និង ផ្សាយកុំឲ្យប្រជាពលរដ្ឋឡើងភ្នំឆ្លងដែន
ចូលទឹកដីថៃកាប់ឈើគ្រញូងដែលមានទីតាំងស្ថិតនៅឃុំអូរស្វាយ
ស្រុកត្រពាំងប្រសាទ ខេត្តឧត្តរមានជ័យ ដូចជាចំណុចភូមិសាស្ត្រ
ច្រកថ្មបីដុំ ច្រកប្រះ ច្រកចំបក់ ច្រកចំការនំឡូង
ច្រកឈើទាលជ្រុំ ច្រកក្បាលអូស្វាយជាដើម។
លោក ឃុន សុភា នាយរងរដ្ឋបាលព្រៃឈើ
ខេត្តបានឲ្យកម្ពុជាថ្មីដឹងថា សមាសភាពចូលរួមមានលោក ផុន ជាកុលសស
អភិបាលរងស្រុកត្រពាំងប្រាសាទ លោក នូ ភិរម្យ នាយផ្នែករដ្ឋបាលព្រៃឈើ
អន្លង់វែង លោក ជៀល សុផល មន្ត្រីសង្កាត់រដ្ឋបាលព្រៃឈើត្រពាំងប្រសាទ និង
លោក លី ស្រេង មេបញ្ជាការ រវៈសេនាតូច ៤១៣ ។ លោក ឃុន សុភា
នាយខណ្ឌបានបន្តទៀតថា លទ្ធផលសម្រេចបានចាប់ពីថ្ងៃទី ២៤ ខែ
មេសាដល់ថ្ងៃទី៧ ខែ ឧសភា ឆ្នាំ២០១២ នេះការទប់ស្កាត់អប់រំផ្សព្វផ្សាយ
ប្រជាពលរដ្ឋចំណាកស្រុកដែលបម្រុងឆ្លងដែនឡើងភ្នំកាប់ឈើគ្រញូងមាន
ចំនួនសរុប ១៣២នាក់ ក្នុងនោះមានស្រីម្នាក់ ដែលមកពីបណ្ដាខេត្ត
ដូចជា ខេត្តសៀមរាប៤៤នាក់ ខេត្តកំពង់ស្ពឺ ២៩នាក់ ខេត្តតាកែវ២នាក់
ខេត្តកំពត ២៤នាក់ ខេត្ត បាត់ដំបង ១នាក់ ខេត្តពោធិ៍សាត់១៤នាក់
ខេត្តឧត្តរមានជ័យ៦នាក់ ឃុំអូរស្វាយ៥នាក់ ខេត្តព្រះវិហារ១នាក់។
លោក ឃុន សុភា នាយរងខណ្ឌរដ្ឋបាលព្រៃឈើ ខេត្តបាន បន្តទៀតថា
ផ្ទះស្នាក់នៅសម្រាប់ប្រជាពលរដ្ឋចំណាកស្រុកបម្រុងឡើងភ្នំចំនួនមួយ
ខ្នងស្ថិតនៅភូមិទំនប់អភិវឌ្ឍន៍ ឃុំអូរស្វាយ
ត្រូវបានឃាត់ម្ចាស់ឈ្មោះ ហុង ងៃ និង ប្រពន្ធឈ្មោះ អូ មុំ
បានយល់ព្រមធ្វើកិច្ចសន្យាមិនយកមនុស្សឡើងភ្នំទៅកាប់ឈើ និង
ឈប់ប្រព្រឹត្តិតទៅទៀត ហើយមធ្យោបាយដឹកជញ្ជូនម៉ូតូ២គ្រឿង
និងរថយន្ត៣គ្រឿង ត្រូវបានទប់ស្កាត់
និងអប់រំណែនាំមិនឲ្យដឹកប្រជាពលរដ្ឋចំណាកស្រុកមកទម្លាក់ក្នុងឃុំ
អូរស្វាយសម្រាប់ឡើងឆ្លងដែនទៅកាប់ឈើគ្រញូងនោះបន្តទៅទៀត៕
ចាន់ធី