សមាគមនិស្សិតឧត្តរមានជ័យ: ស្គរដៃភូមិគូរ

ដោយ សូដា

ភូមិគូរជាភូមិមួយស្ថិតនៅឃុំគោកមន ស្រុកបន្ទាយអំពិល ខេត្តឧត្តរមានជ័យ ដែលមានចម្ងាយប្រហែលជា១៣ គីឡូម៉ែត្រ នៅប៉ែកខាងជើងពីទីរួមស្រុកបន្ទាយអំពិល។ នៅជុំវិញភូមិគូរ ដែលជាភូមិចាស់តាំងពីយូរមកហើយ មានដូចជាភូមិរំចេក គោកសង្កើច ថ្នល់បត់ សិទ្ធិសេរី …...។ ប្រជាជននៃភូមិទាំងអស់រស់នៅជាប់ៗគ្នា ហើយបានរក្សាវប្បធម៌ប្រពៃណី ខុសពីភូមិផ្សេងៗ ក្នុងខេត្តឧត្តរមានជ័យផងដែរ។ ស្គរដៃជាតន្ត្រីដ៏ពេញនិយម និងកំពុងតែមានប្រជាប្រិយភាពរបស់ប្រជាជនក្នុងភូមិគូរ ក៏ដូចជាប្រជាជនក្នុងភូមិដទៃផ្សេងៗទៀតជុំវិញស្រុកបន្ទាយអំពិលដែរ។

ទោះបីជាឧបករណ៍តន្រ្តីសម័យសំបូរបែប បានកើតឡើងយ៉ាងផុលផុសសម្រាប់កម្សាន្តអារម្មណ៍ ក្នុងពិធីបុណ្យចូលឆ្នាំខ្មែរ បុណ្យភ្ជុំបិណ្ឌ និងបុណ្យផ្សេងៗក្នុងភូមិយ៉ាងណាក៏ដោយ ក៏ប្រជាជនមិនបានបោះបង់ចោលឧបករណ៍តន្ត្រីបុរាណ ដែលបានកើតមានតាំងពីយូរលង់ណាស់មកហើយ សម្រាប់កម្សាន្តសប្បាយក្រោយពីឈប់សម្រាកពីការងារច្រូតកាត់ រួមជាមួយការងារផ្សេងៗ និង ក្នុងពិធីបុណ្យផ្សេងៗ។ តន្ត្រីនោះគឺជាតន្ត្រីស្គរដៃ។ បច្ចុប្បន្ននេះទៀតសោត ស្គរដៃមានការពេញនិយម ពីសំណាក់ប្រជាពលរដ្ឋ លើសពីនេះទៅទៀត ស្គរដៃនេះកំពុងតែ ទាញប្រជាប្រិយភាពពី ឧបករណ៍ តន្ត្រីសម័យ "ធុងបាស" ដែលជាឧបករណ៍ទំនើប ហើយចំណាយកម្លាំងមនុស្សតិចក្នុងការសំដែង ហើយក៏មានតម្លៃនៃការជួលទៅបម្រើការសប្បាយមានតម្លៃថោកផងដែរ មួយយប់តម្លៃចាប់ពី ១៥ម៉ឺនរៀល ទៅ ២០ ម៉ឺនរៀល។ ទោះបីតម្លៃនៃការជួលខ្ពស់ជាង ការជួលធុងបាសក៏ពិតមែន តែស្គរដៃនេះនៅតែតម្រូវការរបស់ប្រជាជនទាំងក្មេង ទាំងចាស់ ក្រោយពីមានការកែច្នៃប្រឌិតថ្មី ខុសពីស្គរដៃកាលពី ២ ឬ៣ឆ្នាំមុន។ ស្គរដៃត្រូវបានគេជួល ក្នុងតម្លៃ២៥ម៉ឺនរៀល ទៅ៣០ម៉ឺនរៀលក្នុងមួយយប់។

១. ឧបករណ៍ស្គរដៃកាលពីមុនមានដូចជា៖

ស្គរដៃ ចំនួន១ ទៅ ៣
ទ្រូសោ/ទ្រូអ៊ូ ចំនួន១
ឆឹង ចំនួន១គូរ
កញ្ឆាអង្រួន ចំនួន១គូរ

ប៉ុន្តែក្រោយពីការច្នៃប្រឌិតថ្មី ស្គរដៃមានអភិវឌ្ឍន៍បន្ថែម ដោយមានបញ្ចូលឧបករណ៍ថ្មី ដែលជាឧបករណ៍ច្នៃបន្ថែម និង មានស្រាប់ផងដែរ។

២. ឧបករណ៍ស្គរដៃក្នុងសម័យថ្មី មានដូចជា៖

ស្គរដៃ ចំនួន១ ទៅ ២
ទ្រូសោ/ទ្រូអ៊ូ ចំនួន១
ឆឹង ចំនួន១គូរ
កញ្ឆាអង្រួន ចំនួន១គូរ
ស្គរធំ ចំនួន១គូរ
ស្គរប៉ុក ចំនួន១
ឆាងដែក ចំនួន១គូរ (ឆាងដែកនេះ កែច្នៃចេញពីផាល គោយន្តដៃ ចាស់ចំនួន ៤ យកមកផ្កាប់ដាក់គ្នា មួយគូរៗ)។

កាលពីមុនក្នុងភូមិគូរ និងភូមិជុំវិញភូមិចាស់នេះមានតែស្គរដៃតែមួយវង់ទេ ប៉ុន្តែក្រោយពីការពេញ និយម និងតម្រូវការរបស់ប្រជាជនភូមិ និងក្នុងស្រុកបន្ទាយអំពិលផង ស្គរដៃបានកើតចំនួន ៥វង់ ក្នុងភូមិដែលនៅជុំវិញភូមិគូរនេះចំនួន ៤វង់បន្ថែមទៀត។ ក្នុងនាមខ្ញុំជាស្មេរម្នាក់ ខ្ញុំសូមចូលរួមគាំទ្រ យ៉ាងខ្លាំងដែលមានគំនិតក្នុងការច្នៃប្រឌិត និងបានធ្វើឲ្យតន្ត្រីបុរាណមានការចាប់អារម្មណ៍ឡើងវិញ ចំពោះស្រទាប់មនុស្សក្នុងស្រុកនេះផងដែរ៕៚

Monday, April 30, 2012

ស្គរដៃ​ភូមិ​គូរ

ស្គរដៃភូមិគូរ