ថ្ងៃអង្គារ ទី២៧ ខែមីនា ឆ្នាំ២០១២ ម៉ោង ១៨:២៦
ខេត្តឧត្តរមានជ័យ ៖ យោងតាមប្រភពព័ត៌មានកាលពីពេលថ្មីៗកន្លងមកបានឱ្យដឹងថា ពលរដ្ឋខ្មែរម្នាក់ទៀតត្រូវទាហានសៀមបាញ់ស្លាប់ និង៤នាក់ទៀតបានរត់រួច ខណៈដែលពួកគេទំនងជាទៅស៊ីឈ្នួលកាប់ និងជញ្ជូនឈើគ្រញូងនៅលើខ្នងភ្នំដងរែក ហើយចូលទៅក្នុងដីសៀម ។ នេះមិនមែនជាបញ្ហាថ្មីនោះទេសម្រាប់ការបាញ់សម្លាប់ពីទាហានសៀម ហើយនេះក៏មិនមែនជាព័ត៌មានដំបូងនៃការលួចឆ្លងដែនមរណៈ ដើម្បីកាប់និងជញ្ជូនឈើគ្រញូងពីអ្នកស៊ីឈ្នួលឱ្យពួកឈ្មួញឈើ គ្រញូងដែលចាំទទួលទិញពីពួកគេពេលនាំមកដល់ចង្កេះភ្នំ ។
ទោះបី បញ្ហាកើតមានដដែលៗក្តី ក៏បញ្ហានេះមិនមានការទប់ស្កាត់ ឬមានវិធានការណាមួយហាមឃាត់បានឡើយ សូម្បីតែឈ្មួញម្នាក់ក៏ មិនដែលបានចាប់ខ្លួនដែរ ។ តាមប្រភពព័ត៌មានជុំវិញការបាញ់ស្លាប់ពលរដ្ឋ ខ្មែរម្នាក់ទៀតកាលពីថ្ងៃ២១ មីនា បានឱ្យដឹងថា ពលរដ្ឋខ្មែរដែលស្លាប់បាត់បង់ជីវិតក្នុងចំណោមមនុស្ស៥នាក់ ឈ្មោះហិន វុទ្ធី ភេទប្រុស អាយុ២១ឆ្នាំ រស់នៅក្នុងភូមិចារថ្មី ឃុំទំនប់ដាច់ ស្រុកត្រពាំងប្រាសាទ ។
ឪពុកអ្នកស្លាប់ឈ្មោះ ហ៊ូ ប្រុស អាយុ៤៤ឆ្នាំ បានរៀបរាប់ឱ្យកោះសន្តិភាពដឹងថា កូនរបស់គាត់បានឡើងទៅលើភ្នំដងដែកកាប់ឈើគ្រញូង ត្រូវក្រុមទាហានសៀមបាញ់ស្លាប់ ឯ៤នាក់ទៀតបានរត់រួចមកដល់លំនៅឋានវិញ ។ បើតាមការរៀបរាប់ពីអ្នកដែលបានរត់រួចខ្លួននោះ និយាយថានៅពេលក្រុមទាហានសៀមបាញ់នោះពួកគេពុំទាន់រត់ទេ គឺនៅពួនក្នុងព្រៃ ។ ពេលនោះគឺពួកគេបានឃើញផ្ទាល់ភ្នែកក្រុមទាហានឈុតខ្មៅសៀមចាប់ ឈ្មោះហិន វុទ្ធី បាន រួចបាញ់ចំក្បាលសម្លាប់ បន្ទាប់មកទើបពួកគេនាំគ្នារត់ចេញពីកន្លែងកើតហេតុ ។
ឪពុក អ្នកស្លាប់បន្តថាបន្ទាប់មករូបគាត់បានឱ្យអ្នកដែលរត់ រួចនោះ ជូនគាត់ឡើងទៅកន្លែងកើតហេតុ ហើយឃើញសពកូនគាត់ហើមស្អុយទៅហើយ ។ គាត់មិនហ៊ានបូជាសពនៅទីនោះទេ ព្រោះខ្លាចទាហានសៀមមកបាញ់គាត់ទៀត ដូច្នេះគ្រាន់តែយកបន្លាគ្របពីលើសពប៉ុណ្ណោះ ។
នាថ្ងៃទី២៤ មីនា មានអ្នកឡើងភ្នំដងរែកកាប់ឈើគ្រញូងចំនួន២០ទៅ៣០នាក់ នៅក្នុងចំណោមអ្នកទាំងនោះមានម្នាក់ឈ្មោះសន ធឿន ភេទប្រុស អាយុ២៩ឆ្នាំ មានស្រុកកំណើតនៅស្រុកសង្កែ ខេត្តបាត់ដំបង ដែលទៅស្នាក់នៅភូមិអូរឫស្សី ឃុំអូរស្វាយ ស្រុកត្រពាំង ប្រាសាទ ខេត្តឧត្តរមានជ័យ រៀបរាប់ឱ្យកោះសន្តិភាពដឹងថា ពួកគេរកស៊ីឡើងទៅលើភ្នំដងរែកកាប់ឈើគ្រញូងចំនួន៦ទៅ៨ដង ហើយ។ ពួកគេបានដើរកាត់ព្រៃចូលទៅក្នុងទឹកដីថៃ ដែលមានជម្រៅរាប់គីឡូម៉ែត្រ ។ នៅពេលរកឈើគ្រញូងបានហើយពួកគេនាំគ្នាវិលត្រឡប់មកវិញដោយ ប្រើបច្ចេកទេសចងឈើគ្រញូងចំនួន៤ទៅ៥ដុំ ទំហំ១៥x១៥ប្រវែង១ម៉ែត្រ រួចចងស្ពាយដូចសាក់កាដូដើរកាត់ព្រៃ ចុះអូរ ឡើងភ្នំ ទំរាំចូលមកដល់ក្នុងទឹកដីខ្មែរវិញ។ ពួកគេ លក់ឈើគ្រញូងទាំង នោះបើគិតជាទឹកប្រាក់មានតម្លៃពី១៥០ទៅ២០០ដុល្លារអាមេរិកនៅ សល់ពីការបង់ផ្លូវ ។
ប្រភពដដែលបន្តថា សព្វថ្ងៃនេះមានប្រជាពលរដ្ឋឡើងភ្នំរាប់រយនាក់នៅពេញព្រៃ ៕
