របាយការណ៍ប្រចាំឆ្នាំ២០១០
១. ដើមកំណើតនៃសមាគម
ក្នុងកំឡុងឆ្នាំ១៩៦០ អ្នកឧត្តរមានជ័យ ដែលបានមកស្នាក់នៅទីក្រុងភ្នំពេញ បានបង្កើត សមាគមមួយឈ្មោះថា សមាគមអ្នកឧត្តរមានជ័យ សម្រាប់ផ្ដល់កន្លែង ឲ្យនិស្សិតបានស្នាក់នៅបន្តការសិក្សា តែក្រោយមកដោយសារតែប្រទេសវឹកវរនឹងសង្គ្រាម សមាគមអ្នកឧត្តរមានជ័យក៏បានបាត់ឈ្មោះទៅវិញ។ ទោះបីជាសមាគមនេះ បាត់ទៅហើយក្តី ក៏ចាស់ៗនៅតែផ្ដល់គំនិត ដើម្បីធើ្វយ៉ាងណាឲ្យអ្នកឧត្តរមានជ័យ ចេះជួយគ្នា សាមគ្គីគ្នាតទៅទៀត។ បន្ទាប់មកក្រុម និស្សិតអ្នកឧត្តរមានជ័យ បានមកបន្តការសិក្សានៅឧត្ដមសិក្សាក្នុងទីក្រុងភ្នំពេញ បានជួបការ លំបាក ក្នុងការស្នាក់នៅ ហូបចុក ហើយនិងការសិក្សារបស់សិស្សនិស្សិតមកពីឧត្តរមានជ័យ នូវមានកម្រិត ព្រមទាំងស្រលាញ់ស្រុកកំណើត ហើយថែមទាំងចង់ជួយស្រុកផងនោះ ទើបធ្វើ ឲ្យមានការជួបជុំរបស់និស្សិតដែលកំពុងស្នាក់នៅទីក្រុងភ្នំពេញ ដើម្បីពិភាក្សារកដំណោះស្រាយ។ ទន្ទឹមនឹងនោះផងដែរ ក៏មានកត្តាជំរុញមួយទៀតយ៉ាងខ្លាំងផងដែរ ក៏ព្រោះតែចាស់ជំនាន់មុន តែងតែនិយាយថា ពីជីដូនជីតាមកពួកគាត់តែងតែ ជួយគ្នា និងសាមគ្គីគ្នាជាខ្លាំងនៅក្នុងភូមិ ដើម្បីដោះស្រាយបញ្ហាដែលពួកគាត់ជួបប្រទះ។ ហើយនិស្សិតទាំងអស់បានបង្កើតចេញជារូបរាងសមាគមនិស្សិតឧត្តរមានជ័យនេះ ក្នុងថ្ងៃទី០៦ ខែមិថុនា ឆ្នាំ២០០៦ បន្ទាប់ពីបាន ប្រមូលផ្ដុំនិស្សិតជួបប្រជុំជាច្រើនលើកច្រើនសាតាំងពីចុងខែមីនា និងទទួលបានលិខិតទទួលស្គាល់ពីក្រសួងមហាផ្ទៃនៃប្រទេសកម្ពុជានាថ្ងៃទី២៧ ខែវិច្ឆិកា ឆ្នាំ២០០៨ ដែលដឹកនាំដោយ ក្រុមនិស្សិតមកពីខេត្តឧត្តរមានជ័យ កំពុងសិក្សានៅទីក្រុងភ្នំពេញតាមបណ្ដាសាកលវិទ្យាល័យនានា។
២.គោលបំណង និងទិសដៅ
សមាគមនិស្សិតឧត្តរមានជ័យ មានគោលបំណងចូលរួមចំណែកអភិវឌ្ឍន៍ វិស័យអប់រំ សង្គមកិច្ច សុខភាព សុខុមាលភាពរបស់ប្រជាពលរដ្ឋនៅក្នុងតំបន់ផងដែរ។ ដើម្បីឆ្ពោះទៅគោល
បំណងខាងលើ សមាគមមានទិសដៅដូចចែងខាងក្រោម៖
១. ផ្តល់ការឧបត្ថម្ភ សិស្សនិស្សិត ដែលមានកំណើតនៅឧត្តរមានជ័យ ឲ្យមានលទ្ធភាព
បន្តការសិក្សាឲ្យបានខ្ពង់ខ្ពស់
២. ផ្ដល់ការគាំទ្រផ្នែកសុខភាពដល់ប្រជាពលរដ្ឋ
៣. ឧបត្ថម្ភ និងផ្ដល់ការបណ្ដុះបណ្ដាលវិជ្ជាជីវៈសមស្របតាមសមត្ថភាព តាមសេចក្ដី
ត្រូវការ, ផ្ដល់ការគាំទ្រផ្នែកបច្ចេកទេស កសិកម្ម កសិឧស្សាហកម្ម សិប្បកម្ម និង
ត្រូវការ, ផ្ដល់ការគាំទ្រផ្នែកបច្ចេកទេស កសិកម្ម កសិឧស្សាហកម្ម សិប្បកម្ម និង
ជួយស្វែងរកទីផ្សារ
ទស្សនវិស័យ
ចូលរួមលើកស្ទួយវិស័យអប់រំនៅតាមមូលដ្ឋាន និងជួយជំរុញសិស្សនិស្សិតឲ្យឈានទៅបន្តការសិក្សានៅថ្នាក់ឧត្ដម ដែលជាធនធានមនុស្សប្រកបដោយចំណេះដឹង សីលធម៌ ស្មោះត្រង់ និងទំនួលខុសត្រូវ ដើម្បីរួមចំណែកក្នុងអភិវឌ្ឍខេត្ត ក៏ដូចជាប្រទេសជាតិផងដែរ។
បេសកកម្ម
ផ្ដល់នូវការជួយឧបត្ថម្ភដល់និស្សិតដែលមកពីខេត្តឧត្តរមានជ័យ និងការបណ្ដុះបណ្ដាលវិជ្ជាជីវៈដល់ប្រជាពលរដ្ឋនៅតាមមូលដ្ឋានសមស្របតាមសមត្ថភាព តាមសេចក្ដីត្រូវការ និងឲ្យយល់ដឹងពីអត្ថប្រយោជន៍នៃការអប់រំ
៣. សកម្មភាព
នៅក្នុងឆ្នាំសិក្សា២០១០ -២០១១ សមាគមនិស្សិតឧត្តរមានជ័យមាននិស្សិតស្នាក់នៅ អន្តេវាសិកដ្ឋាន ចំនួន ១៨ នាក់ ស្រី២នាក់ ដើម្បីបន្តការសិក្សាក្នុងជំនាញផ្សេងៗពីគ្នា តាមសាកលវិទ្យាល័យនានាក្នុងក្រុងភ្នំពេញ ប៉ុន្តែមាននិស្សិតចំនួន៦នាក់បានទៅរស់នៅខាងក្រៅ ដោយ សារពួកគេមានលទ្ធភាពក្នុងការជួលផ្ទះ ព្រមទាំងទុកឱកាសសម្រាប់ប្អូនជំនាន់ក្រោយមកបន្តការសិក្សាដូចពួកគាត់ដែរ និងម្នាក់ទៀតគឺកញ្ញា ហ៊ុន លីណា បានត្រូវបញ្ជូនឲ្យទៅរស់នៅក្នុង មូលនិធិហាប់ស៊្វែល (Harpswell Foundation)។ សរុបចំនួននិស្សិតដែលបានមកស្នាក់នៅក្នុងអន្តេវាសិកដ្ឋានសមាគមមានចំនួន៤១នាក់ ស្រី៧នាក់ រួមបញ្ចូលទាំងនិស្សិតឆ្នាំថ្មីផង។
សមាគមនិស្សិតឧត្តរមានជ័យមានអន្តេវាសិកដ្ឋានចំនួន២ អន្តេវាសិកដ្ឋានរបស់សមាគមទី១ នៅកណ្ដាលទីក្រុងភ្នំពេញឈ្មោះថា “ផ្ទះនិស្សិតឧត្តរមានជ័យ”។ អាសយដ្ឋាន ផ្ទះលេខ ៤០ អា ផ្លូវ ១៣៨ សង្កាត់ផ្សារដេប៉ូ II ខណ្ឌទួលគោក (មាននិស្សិតរស់នៅចំនួន ១២នាក់ ស្រី១នាក់ ប្រុស១១នាក់) និងស្ថិតនៅក្រោមការជួយឧបត្ថម្ភការជួលផ្ទះពីលោកអ៊ំ លោកពូ អ្នកមីង អ្នកឧត្តរមានជ័យនៅប្រទេសបារាំង។ អន្តេវាសិកដ្ឋានទី២ ស្ថិតនៅផ្ទះលេខ៥៥៣ ផ្លូវ៨៣P (ផ្លូវលំ ៥០ខ្នងទីII) ភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ។ លោកបង ខូ តារាឫទ្ធិ ជាម្ចាស់ផ្ទះ បានអនុញ្ញតិឲ្យនិស្សិតស្នាក់ នៅដោយមិនចាំបាច់បង់ថ្លៃផ្ទះ។ បច្ចុប្បន្នមាននិស្សិតមកពីឧត្តរមានជ័យរស់នៅ ចំនួន៥នាក់ ស្រី ១ ប្រុស៤នាក់។
ទន្ទឹមនឹងនោះផងដែរ សម្រាប់ឆ្នាំសិក្សា២០១០-២០១១ សមាគម និស្សិតឧត្តរមានជ័យបានទទួលនិស្សិតឲ្យស្នាក់នៅក្នុងអន្តេវាសិកដ្ឋានទាំងពីរ មានចំនួន៦នាក់ ស្រី១នាក់ ប្រុស០៥នាក់បន្ថែមទៀត ដែលមានដូចជា៖
- ផាត សិលា និស្សិតឆ្នាំទី ១ នៃសាកលវិទ្យាល័យវេសស្ទើន ជំនាញសេដ្ឋកិច្ច និងនិស្សិតបង់ថ្លៃ។
- ឆិម សុផា និស្សិតឆ្នាំទី១ នៃសាកលវិទ្យាល័យនីតិសាស្ត្រនិងសេដ្ឋកិច្ច ជំនាញគណនេយ្យ និងជានិស្សិតអាហារូបករណ៍ ១០០ ភាគរយរបស់សម្ដេច ហ៊ុន សែន។
- យឿង រតនា (ស្រី) និស្សិតឆ្នាំទី១ នៃវិទ្យាស្ថានបច្ចេកវិទ្យានៃកម្ពុជា ជំនាញវិស្វករអគ្គិសនី និង ជានិស្សិតអាហារូបករណ៍។
- ជិម ជីវ៉ា និស្សិតឆ្នាំទី១ នៃសាកលវិទ្យាល័យភូមិន្ទភ្នំពេញ ជំនាញគណិតវិទ្យាវិទ្យា និងជានិស្សិតថ្នាក់បង់ថ្លៃ។
- ឡាន ចំណាន និស្សិតឆ្នាំទី១ នៃសាកលវិទ្យាល័យភូមិន្ទភ្នំពេញ ជំនាញអក្សរសាស្ត្រខ្មែរ និងជានិស្សិតថ្នាក់បង់ថ្លៃ។
- ភួន សុភាន់ និស្សិតឆ្នាំទី១ នៃវិទ្យាស្ថានវ៉ាន់ដាគណនេយ្យ ជំនាញគណនេយ្យ និងជា និស្សិតបង់ថ្លៃ។
១. ខែមករា ឆ្នាំ២០១០ សមាគមនិស្សិតឧត្តរមានជ័យបានរៀបចំរចនាសម្ព័ន្ធសមាគម និង រំលឹក វិន័យគោលការណ៍នានារបស់សមាគមសារជាថ្មីដល់និស្សិតទាំងថ្មីនិងចាស់ ក្រោមការដឹកនាំរបស់ លោកប្រធាន ស្មឿន ណារ៉េន។ និងដាក់ផែនការសម្រាប់អនុវត្តក្នុងឆ្នាំ២០១០ ដល់សមាជិក សមាជិកា សិស្សនិស្សិតទាំងអស់ក្នុងអន្តេវាសិកដ្ឋាន។
២. ថ្ងៃទី ២៤ ខែកុម្ភៈនិស្សិតទាំងអស់នៅក្នុងអន្តេវាសិកដ្ឋាន ទាំងអស់បានជួបប្រជុំគ្នាដើម្បីរៀបចំ កម្មវិធី “ញ៉ាំអាហារឆ្ងាញ់” ដែលឧបត្ថម្ភដោយ លោក គង់ ធឿយ និងក្រុមគ្រួសារ នៅក្នុងអន្តអន្តេវាសិកដ្ឋានទី២របស់សមាគម បន្ទាប់ពីទទួលទានអាហារជាមួយគ្នាហើយ លោកគង់ ធឿយ ដែលលោកអញ្ជើញមកពីសហរដ្ឋអាមេរិក បានផ្ដល់ដំបូន្មាន និងចែករំលែកបទពិសោធន៍ក្នុងការរៀនសូត្រ និងអំពីជីវិតក្នុងសង្គមដល់និស្សិតទាំងអស់ក្នុងអន្តេវាសិកដ្ឋាន។
២. ចុងខែ កុម្ភៈ ប្រធានសមាគមនិស្សិតឧត្តរមានជ័យ សុំលាលែងពីដំណែង ដោយលោកមមាញឹកនិងការសិក្សា មិនមានពេលគ្រប់គ្រាន់ក្នុងការដឹកនាំនិស្សិត ការងារផ្សេងៗដែលសមាគមដំណើរការ ហើយទន្ទឹមមានការប្រកាសលាលែងពីដំណែង ក្រុមប្រឹក្សាភិបាលសមាគមបានជ្រើសរើសប្រធានថ្មី ដើម្បីបន្តការដឹកនាំជាមន្តទៅទៀតដោយធ្វើការបោះឆ្នោត។ ក្រោយពីធ្វើការបោះឆ្នោតជ្រើសរើស ថ្នាក់ដឹកនាំសម្រាប់សមាគមនិស្សិតឧត្តរមានជ័យ លោក សាន វុឌ្ឍី បានជាប់ឆ្នោតជាប្រធានថ្មី និងបានប្រគល់ការងារជូនតាំងពីពេលនោះមក។
៣. ដើមខែមីនា ឆ្នាំ២០១០ ក្រោមការដឹកនាំរបស់ប្រធានសមាគមនិស្សិតឧត្តរមានជ័យមាន បើកអង្គប្រជុំស្ដីពីផែនការបន្តបន្ទាប់ពីលោកបានទទួលតំណែង និង ប្រជុំបែងចែកការងារ ដែលត្រូវធ្វើសម្រាប់ខែមេសា តាំងពេលការងារដំបូងរហូតដល់ពេលប្រារព្ធកម្មវិធីត្រូវបញ្ចប់។ ឆ្លៀតក្នុងឱកាសនោះផងដែរ លោកប្រធានបានផ្ដល់អនុសាសន៍មួយចំនួនដល់និស្សិតទាំងអស់ក្នុងអន្តេវាសិកដ្ឋាននូវការប្រតិបត្តិវិន័យដែលមានស្រាប់មកនោះជាការរំលឹកដាស់តឿន។
សមាគមនិស្សិតឧត្តរមានជ័យបានរៀបចំបោះពុម្ពសៀវភៅដែលមានចំណងជើងថា
“ចំណាប់អារម្មណ៍របស់និស្សិតដែលបានមកបន្តការសិក្សាក្នុងទីក្រុងភ្នំពេញ” សម្រាប់យកទៅចែកជូនសិស្សប្អូនក្នុងពេលប្រារព្ធកម្មវិធី ខែមេសា។
៤. ថ្ងៃទី១០ ខែមេសា សមាគមប្រារព្ធកម្មវិធី រួមគ្នាអភិវឌ្ឍន៍ឧត្តរមានជ័យ ក្នុងភូមិគោកស្វាយ ឃុំគោកមន ស្រុកបន្ទាយអំពិល ខេត្តឧត្តរមានជ័យ ដែលមានអ្នកចូលរួមចំនួន១២០នាក់ ក្នុងនោះមាន និស្សិត ឪពុកម្ដាយនិស្សិត អាជ្ញាធរដែនដី លោកគ្រូ អ្នកគ្រូ មន្ត្រីរាជការក្នុងវិស័យអប់រំ និងព្រះសង្ឃ ព្រមទាំងលោកស្រីអភិបាលរងស្រុក ស្លោម គឹមឡន ជាគណៈអធិបតី។ កម្មវិធី រួម គ្នាអភិវឌ្ឍន៍ឧត្តរមានជ័យ នេះ មានគោលបំណងដើម្បីរួមចំណែកអភិវឌ្ឍន៍វិស័យអប់រំនៅក្នុងខេត្តឧត្តរមានជ័យឲ្យកាន់តែមានភាពទូលំទូលាយ ហើយអាចប្រកួតប្រជែងទីផ្សារការងារនាពេលបច្ចុប្បន្ននិងអនាគតឲ្យកាន់តែមានប្រសិទ្ធភាព។ លោកប្រធានសមាគមមានប្រសាសន៍ ក្នុងកម្មវិធី ដើម្បីរួមគ្នាអភិវឌ្ឍន៍បាន មានតែការចូលរួម ពីយើងទាំងអស់គ្នាជាកត្តាសំខាន់ មានដូចខាងក្រោម៖
- ជំរុញសិស្សនិស្សិតឲ្យបានបន្តការសិក្សានៅឧត្ដម បន្ទាប់ពីប្រឡងជាប់សញ្ញាប័ត្រទុតិយភូមិ កុំឲ្យបោះបង់ការសិក្សា ត្រូវគិតថាការសិក្សាជាការសំខាន់សម្រាប់ជីវិត និងជីវភាពនៅពេលអនាគត។ ការសិក្សានៅឧត្ដមសិក្សា ជាការបើកទំព័រជីវិតថ្មីមួយដែលយើងម្នាក់ៗពុំសូវបានឃើញនិងជួបប្រទះពីមុនមក កាលណាយើងមានជំនាញពិតប្រាកដ យើងនឹងមានអ្វីៗដែលបានបងប្រាថ្នា។
- សិស្សនិស្សិតខ្លួនឯងផ្ទាល់ត្រូវស្វះស្វែងរកបទពិសោធន៍សិក្សានៅមធ្យមសិក្សា ក៏ដូចជានៅឧត្ដមសិក្សាផងដែរ។ ក្នុងកន្លែងនេះខ្ញុំបានមើលឃើញថា ការសិក្សានៅទីក្រុងមានការខុសប្លែក ពីនៅការសិក្សានៅក្នុងខេត្តយើង អ្នកទីក្រុងចូលចិត្តអានសៀវភៅ មានតែសៀវភៅទេ ដែលជាមិត្តដ៏ល្អមិននាំទៅរកផ្លូវអាក្រក់ ការអានមានសារៈសំខាន់ណាស់សម្រាប់ការសិក្សាឧត្ដមសិក្សា និងបង្កើតក្រុមស្វ័យសិក្សា យើងម្នាក់ៗមិនត្រូវបន្ទោសថា
គ្រូបង្រៀនមិនកើត តែតើយើងបានសួរខ្លួនយើងប្រឹងអស់ពីសមត្ថភាពហើយឬនៅ?
- និងចុងក្រោយជាការចូលរួមជំរុញពីឪពុកម្តាយ និង សហគមន៍ផ្ទាល់ដែលជាអ្នកបណ្ដុះទំពាំងល្អដែលអាចស្នងឫស្សីបានទៅថ្ងៃអនាគត។
លោកស្រីអភិបាលរងស្រុក មានសេចក្ដីត្រេកអរយ៉ាងខ្លាំងដែលឃើញអតីតជាសិស្សរបស់ គាត់មានវត្តមានមកចូលរួមក្នុងកម្មវិធីហើយជាការសមាជិកសកម្មរបស់សមាគមផងដែរ លើសពីនោះទៅទៀតបានមកចូលរួមជំរុញសិស្សប្អូនឲ្យមានឱកាសបន្តការសិក្សា។ ចំណែក ឯមន្ត្រីខាងផ្នែកអប់រំក្នុងតំបន់ លោកបានស្វាគមន៍ដែលមានសមាគមនិស្សិតបានមកធ្វើបទ បង្ហាញសម្រាប់សិស្សប្អូនជំនាន់ក្រោយផងដែរ។
៥. ថ្ងៃទី៣០ ខែឧសភា លោកសាស្ត្រាចារ្យ ហេង ស្រ៊ាង នៃសាកលវិទ្យាល័យបញ្ញាសាស្រ្ត ធ្វើបទ បង្ហាញពី សហគ្រិននយោបាយនៅកម្ពុជា ដែលជាអត្ថបទស្រាវជ្រាវរបស់លោក ដល់និស្សិតក្នុងសមាគម បានជាព័ត៌មានក្នុងសិក្សា និង សាមគ្គីភាពក្នុងការប្រតិបត្តិការងារក្នុងសមាគម។
៦. ថ្ងៃទី ២៧ ខែមិថុនា អ្នកស្រី Allyson Hoston អ្នកនិពន្ធជនជាតិអូស្ត្រាលី ធ្វើបទបង្ហាញអំពី ការរស់នៅក្នុងប្រទេសអូស្ត្រាលី និងការនិពន្ធអត្ថបទ ដោយសមាគមនិស្សិតឧត្តរមានជ័យទើប និងចេញសេចក្ដីប្រកាសដល់និស្សិតឲ្យនិពន្ធអត្ថបទក្នុងមួយខែ ជារៀងរាល់ខែ។
នៅដើមខែមិថុនា លោកប្រធាន សាន វុឌ្ឍី សុំលាលែងពីដំណែង ដោយលោករវល់និងការ សិក្សាហើយ លោកបានទៅស្នាក់ក្នុងអន្តេវាសិកដ្ឋានរបស់សាលា ដើម្បីធ្វើការងារជាជំនួយការគ្រូបង្រៀនក្នុងសាលា។ ក្រុមប្រឹក្សាភិបាលកោះអញ្ជើញ សមាជិកសមាជិកាប្រជុំ រកអ្នកស្ម័គ្រចិត្តដឹកនាំសមាគមបន្តទៀត តែដោយសារគ្មាននិងមិនមានអ្នកឈរឈ្មោះបោះឆ្នោត លោកខូ តារាឫទ្ធិ ជាអ្នកដឹកនាំអង្គប្រជុំ បានជ្រើសរើសតែងតាំង លោកអ៊ិន សូដា ដែលជាអតីតប្រធាន ដឹកនាំសមាគមនិស្សិតឧត្តរមានជ័យតាំងពីមានរចនាសម្ព័ន្ធ ធ្វើការដឹកនាំរហូតដល់ឆ្នាំ២០១២។
៧. នៅថ្ងៃទី២៥ ខែកក្កដា ឆ្នាំ២០១០ លោក John Hogan ជានាយកសាលាញ៉ូវតុនធីឡាយ និង វិទ្យាស្ថានពិភពថ្មី មកចែករំលែកនូវ បទពិសោធន៍ការងារដែលធ្លាប់ធ្វើក្នុងប្រទេសកម្ពុជា និងប្រទេសរបស់លោកផ្ទាល់។ លោកសង្កត់ធ្ងន់ លើការទទួលខុសត្រូវ ធ្វើការអ្វីមួយមិនត្រូវគិតថា តូច ឬធំទេ សំខាន់គឺធ្វើកិច្ចការនោះឲ្យបានល្អបំផុតសម្រាប់ខ្លួនឯង និងអ្នកដ៏ទៃទទួលយកបាន។
ចំណែក កញ្ញា ភឿង សុភ័ក្រ្ត ជាអ្នកស្មូតកំណាព្យ ដើម្បីឲ្យការផ្លាស់ប្ដូរបទពិសោធន៍ កាន់តែមានការយកចិត្តទុកដាក់ទៀត កញ្ញាបានបង្ហាញពីការសូត្រកំណាព្យចំនួនបទ សម្រាប់ កំដរបរិយាកាសនេះផងដែរ។ ក្នុងខែនេះផងដែរ យើងបានទទួលអ្នកស្រីកែវ ចាន់បូរណ៍ និងលោកហង្ស ផល្លា ជាអ្នកនិពន្ធមកពិសាអាហារជាមួយនឹងនិស្សិតក្នុងសមាគមដើម្បីជាការស្គាល់គ្នា។
៨. ថ្ងៃទី៣១ ខែកក្តដា បងស្រី ចាន់ សំណាងជាសាស្ត្រាចារ្យភាសាអង់គ្លេស នៃសាកលវិទ្យាល័យវេសស្ទើន និងបម្រើការងារនៅអង្គការសហការណ៍ បានចែករំលែកបទពិសោធន៍នៃការនិយាយភាសាអង់គ្លេស ដោយក្នុងនោះបងស្រីបានអនុញ្ញាតឲ្យនិស្សិតក្នុងអន្តេវាសិកដ្ឋាននិយាយម្ដងម្នាក់ និងផ្ដល់ឱវាទមួយចំនួនទាក់ទងក្នុងការនិយាយដើម្បីជៀសវាងកំហុសមួយចំនួន។
៩. ថ្ងៃទី ៧ខែសីហា លោកពិសិដ្ឋ ជាជំនួញការនៅប្រទេសបារាំងចែករំលែកបទពិសោធន៍ ពីការធ្វើជំនួញដល់និស្សិតក្នុងអន្តេវាសិកដ្ឋាន។ និយាយពីបែបបទនៃការធ្វើជំនួយ ក្នុងការរៀបចំទុក ជាមុនរបស់ប្រទេសជាតិមួយៗមុននិងផែនការនោះមកដល់។
១០. ថ្ងៃទី៥ខែកញ្ញា លោកម៉េង អេដែត ជាសាស្ត្រាចារ្យនៃសាកលវិទ្យាល័យ អាយ អាយ ស៊ី បាន បណ្ដុះបណ្ដាលនិស្សិតក្នុងអន្តេវាសិកដ្ឋាន រយៈពេល៨ម៉ោង ទាក់ទងនឹង Mindset។ Mindset នេះមានច្រើនវគ្គផងដែរ តែលោកសូមលោកតែវគ្គទី១ មកបង្ហាញដោយ យើងមានរយៈពេលខ្លី ដែលវគ្គនេះ និយាយអំពី ការរៀបចំចិត្តគំនិតបែបណាដើម្បីទទួលបានជោគជ័យ។ ក្នុងសិក្សារយៈ ៨ម៉ោងនេះបានធ្វើឲ្យនិស្សិតយើងបានបង្ហាញ បញ្ចេញនូវគំនិតគោលបំណងមួយចំនួន ដើម្បីយកមកវិភាគក្នុងវគ្គនេះ។ ក្រោយពីបណ្ដុះបណ្ដាលវគ្គនេះ មាននិស្សិតមួយចំនួនបានផ្លាស់ប្ដូរការគិត និងការរៀបចំខ្លួន។
១១. ក្នុងខែតុលា មាននិស្សិតមួយចំនួនធំបានទៅស្រុកកំណើត ដើម្បីជួបជុំបងប្អូនក្នុងបុណ្យ កាន់បិណ្ឌ ឬភ្ជុំបិណ្ឌ។ ពេលសម្រាកមែនពិត និស្សិតយើងដែរទៅស្រុកបានទៅធ្វើការស្រាវជ្រាវ លើកដំបូងរបស់ខ្លួនក្នុងខេត្តនិងស្រុកកំណើតរបស់ខ្លួន។ ជាលទ្ធផលចុងក្រោយ នៃការស្រាវជ្រាវ ដោយការទៅស្រុកកំណើតមានរយៈពេលខ្លី ហើយជួបបញ្ហាជាមួយអាកាសធាតុមិនអំណោយផល ផ្លូវទៅកាន់ភូមិមួយចំនួនត្រូវ ទឹកភ្លៀងលិច ដែលមិនអាចទៅធ្វើការស្រាវជ្រាវបាន។ ជាលទ្ធផលជំហានដំបូង និស្សិតយើងបានស្រាវជ្រាវពីប្រវត្តិភូមិចំនួន៣ ក្នុងខេត្ត មានដូចជាភូមិ ជើងទៀន ខ្នារ និង ភូមិគោកមន។
១២. ថ្ងៃទី២៤ ខែវិច្ឆិកា ប្រធានសមាគម និង ក្លឹប និស្សិតឧត្តរមានជ័យ បានដឹកនាំនិស្សិតឧត្តរមានជ័យ បង្សុកូលជូនដល់និស្សិតដែលបានមរណភាពក្នុងតំបន់កោះពេជ្រ នៅកន្លែងស្ពានពេជ្រដែលជាកន្លែងកើតហេតុ និងមាននិស្សិតចំនួន២០នាក់ចូលរួម និងប្រារព្ធវិញ្ញាណក្ខន្ធដោយស្មិងស្មាធិ៍ចំនួនមួយនាទី បន្ទាប់ពីបង្សុកូលចប់។
- ថ្ងៃទី២៨ខែវិច្ឆិកា សមាគមនិស្សិតឧត្តរមានជ័យបាន រៀបចំកម្មវិធីរំលឹកខួប លើកទី២ របស់សមាគមដែលបានទទួលស្គាល់ពីក្រសួងមហាផ្ទៃនៃប្រទេសកម្ពុជា និងនិមន្តព្រះសង្ឃ សូត្រមន្ត បង្សុកូល ឧទ្ទិសដល់វិញ្ញាណក្ខន្ធនិស្សិតអ្នកឧត្តរមានជ័យពីរនាក់ដែលទទួលមរណភាពនៅតំបន់កោះពេជ្រកាលពីថ្ងែទី២២ ខែវិច្ឆិកា (និស្សិតទឹម រ័ត្នមុន្នី ជំនាញ ទីផ្សារ ទើបនឹងបញ្ចប់ក្នុងខែកក្កដាកន្លងនៃ សាកលវិទ្យាល័យជាតិគ្រប់គ្រង។ និស្សិត រឿន ស្រីរ័ត្ន ជំនាញ គណនេយ្យឆ្នាំទី២ នៃសាកលវិទ្យាល័យមេគង្គកម្ពុជា)។ ការប្រារព្ធខួបលើកទី២ ក្រោមប្រធានបទ “ឧត្តរមានជ័យតែមួយ” ក្នុងគោលបំណងប្រមូលផ្ដុំនិស្សិតឧត្តរមានជ័យដែលបានមកសិក្សាក្នុងទីក្រុងភ្នំពេញ ព្រមទំាងអ្នកដែលពាក់ព័ន្ធនឹងទឹកដីឧត្តរមានជ័យទាំងអស់ ដើម្បីសាមគ្គីភាព មិត្តភាព ភាតរភាពរវាងសិស្ស និងនិស្សិតទាំងអស់។ កម្មវិធីនេះមានសិស្សមកខេត្តចំនួនបីនាក់ចូលរួម និស្សិតដែលបានបន្តការសិក្សាក្នុងក្រុងភ្នំពេញប្រមាណ ២៥នាក់ អតីតនិស្សិតដែលជាសមាជិកស្ថាបនិករបស់សមាគម ព្រមទាំងនិស្សិតក្នុងសមាគម សរុបប្រមាណ ៤៥នាក់ដែលបានចូលរួម។
១៣. ថ្ងៃទី១៩ ខែធ្នូ ក្នុងអន្តេវាសិកដ្ឋានរបស់សមាគម បើកវគ្គបណ្ដុះបណ្ដាលនិស្សិតថ្មី នៅការ ប្រើប្រាស់អ៊ិនធឺណិត អ៊ីម៉ែល និងបង្កើតវ៉ែបប្លកសម្រាប់សមាគម ដែលមានអាសយដ្ឋាននោះ www.oddormeancheystudent.blogspot.com។
- ថ្ងៃទី២៥ ខែធ្នូ ប្រធានសមាគមបាននាំយកនូវប្រាក់ឧបត្ថម្ភ ពីបងប្អូនខ្មែរ និងពីមូលមូលនិធិហាប់ស្វ៊ែល ជូនដល់គ្រួសារនិស្សិតដែលទទួលមរណភាពនៅតំបន់កោះពេជ្រ នៅតាមគេហដ្ឋាននិស្សិតម្នាក់ៗ ក្នុងស្រុកកំណើត និងចូលរួមមរណៈទុក្ខយ៉ាងក្រៀមក្រំជាមួយ និងគ្រួសារនិស្សិតផងដែរ។ ហើយក្រុមគ្រួសារនិស្សិតទាំងពីរ បានជម្រាបជូនដំណឹងផងដែរ លោកនឹងធ្វើពិធីបុណ្យខួប១០០ថ្ងៃដល់មិត្តនិស្សិតទាំងអស់ និងលោក លោកស្រី ទាំងអស់ ដែលកម្មវិធីបុណ្យនឹងប្រព្រឹត្តទៅក្នុងចុងខែកុម្ភៈ និង ដើមខែមីនាខាងមុខនេះ។
៤. សេចក្ដីអំពាវនាវ
ចាប់តាំងពីសមាគមនិស្សិតឧត្តរមានជ័យ កកើតមកយើងបានមើលឃើញការលំបាកជា ច្រើនរបស់សិស្សដែលទើបតែប្រលងចប់មធ្យមសិក្សាទុតិយភូមិ មិនដឹងថាត្រូវធ្វើអ្វី ដោយមួយចំនួនទៀតបោះបង់ការសិក្សានៅមហាវិទ្យាល័យ ហើយនិងមួយចំនួនមកបន្តការសិក្សាហើយជួបការលំបាកក្នុងការចំណាយសម្រាប់ការហូបចុក និងកន្លែងស្នាក់នៅ។
អាស្រ័យដូចជម្រាបជូនខាងលើ ក្នុងនាមខ្ញុំជាគណៈកម្មាធិការប្រតិបត្តិរបស់សមាគម សូមអំពាវនាវដល់សប្បុរសជនគ្រប់និន្នាការ និងជាន់ថ្នាក់ នឹងជាពិសេសលោកអ៊ំ លោកពូ អ្នកមីង បងប្អូនអ្នកឧត្តរមានជ័យទាំងអស់ដែលបានអាននូវរបាយការណ៍នេះហើយ មេត្តាជួយជ្រោមជ្រែងជាបន្តទៀត ដើម្បីផ្ដល់ក្ដីសង្ឃឹមដល់ សិស្ស និស្សិត និងយុវជនខេត្តឧត្តរមានជ័យ បានសាងស្រុកកំណើតនៅពេលខាងមុខ។ លើសពីនោះទៅទៀត យើងខ្ញុំនឹងយកថវិកា ព្រមទាំងសម្ភារៈទាំងនេះទៅប្រើប្រាស់ឲ្យចំគោលដៅ និងមានតម្លាភាព។ យើងខ្ញុំសូមភ្ជាប់មកជាមួយនូវរបាយការណ៍ហិរញ្ញវត្ថុ និងគម្រោងផែនការឆ្នាំ២០១១។
ចុងបញ្ចប់ យើងខ្ញុំជាគណៈកម្មាធិការប្រតិបត្តិ សមាជិកសមាជិកា និងសិស្សនិស្សិតដែល កំពុងសិក្សាក្នុងទីក្រុងភ្នំពេញសូមថ្លែងអំណរគុណដ៏ថ្លៃថ្លាជូនចំពោះលោក លោកស្រី លោកអ៊ំ លោកពូ អ្នកមីង នឹងបងប្អូនខ្មែរដែលបានបរិច្ចាគថវិកា ព្រមទាំងកម្លាំងកាយ កម្លាំងចិត្ត និងលះបង់ពេលវេលាដ៏មានតម្លៃ ដើម្បីជួយសមាគមនិស្សិតឧត្តរមានជ័យ និងនិស្សិតដែលកំពុង តែខ្វះខាតដែលបានមកបន្តការសិក្សានៅទីក្រុងភ្នំពេញ។ នេះជាសក្ខីភាពឧឡារិកដែលសរ បញ្ជាក់ឲ្យឃើញថាលោក លោកស្រី លោកអ៊ំ ពូ មីងបានយកចិត្តទុកដាក់ជួយជ្រោមជ្រែង ដែលធ្វើឲ្យយើងខ្ញុំទាំងអស់គ្នាចងចាំជានិច្ច ពុំអាចបំភ្លេចបាន ហើយក៏សូមប្រសិទ្ធពរជូនដល់ លោក លោកស្រី បានជួបតែនឹងពុទ្ធបួនប្រការ អាយុ វណ្ណៈ សុខ ពល កុំបីឃ្លៀងឃ្លាតឡើយ៕
