ដោយ ហង្ស សាវយុត
អត្ថបទរបស់វិទ្យុអាស៊ីសេរី
មន្ត្រីក្រុមប្រឹក្សាស្រុកមួយរូប របស់ខេត្តសៀមរាបបានសំដែងការព្រួយបារម្ភថា ព្រៃឈើដ៏សម្បើមដែលត្រូវការពាររបស់ដែនជម្រកសត្វព្រៃនៃឧទ្យាន ជាតិគូលែនព្រហ្មទេព នៅតំបន់ជប់សោម ដីក្រហមអូរទី៤ អាចនឹងបាត់បង់យ៉ាងឆាប់រហ័ស ដោយសារតែគេកាប់ប្រចាំថ្ងៃ ហើយមិនមានកិច្ចការពារពីមន្ត្រីបរិស្ថាន ដែលជាឧទ្យាននុរក្សទីនោះទេ។លោក ម៉ៅ សារ៉ាត់ សមាជិកក្រុមប្រឹក្សាស្រុកស្វាយលើ បានមានប្រសាសន៍កាលពីល្ងាចថ្ងៃសៅរ៍ ទី១ ខែមករាថា លោកទើបតែបានធ្វើដំណើរទៅកាន់តំបន់ដែនជម្រកសត្វព្រៃនៃឧទ្យាន ជាតិគូលែនព្រហ្មទេពនោះ ហើយបានឃើញសកម្មភាពកាប់ព្រៃឈើជាច្រើន ដើម្បីរុករានយកដីជាកម្មសិទ្ធិឯកជន និងមានអ្នកស្លៀកពាក់ទាហានខ្លះបានកាប់ឈើលក់ ៖ "ក្នុងដែនព្រៃ ស្អាកហ្នឹងចម្ងាយពីថ្នល់ High Way ទៅច្រកអន្លង់វែងប្រហែលពី៨ ទៅ៩គីឡូម៉ែត្រ។ ទឹកដីនោះវាព្រំប្រទល់ឃុំស្រែណូយ និងឃុំកន្ទួត ស្រុកស្វាយលើ។ ថតបានទាំងរទេះដឹកឈើដឹកអីទៀតផង។ អ្នកដែលត្រួសព្រៃហ្នឹងកាប់ផ្ដួលទាំងស្រុងបណ្ដោយ ធ្វើចម្ការតូចប៉ុណ្ណាក៏វាកាប់ដែរ ប៉ុន្តែអ្នកដែលកាប់ឈើអារលក់នោះ វាកាប់ឈើប្រភេទដើមផ្ដៀកដើមធំៗ។ អាម៉ាស៊ីនត្រង់ស៊ីន័រនោះវាចូលកាត់លាន់ពេញព្រៃហ្មង"។
តំបន់ដែនឧទ្យានដែលកំពុងទទួលរងការកាប់ឈើនោះ ត្រូវបានគេដឹងថា ស្ថិតនៅក្រោមការគ្រប់គ្រង និងការពាររបស់មន្ត្រីបរិស្ថានឧទ្យាននុរក្ស នៅចំណុចត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប។ ប៉ុន្តែលោក ហុង តារាវុធ ប្រធានឧទ្យាននុរក្សនៃមន្ទីរបរិស្ថានខេត្តសៀមរាបមិនអាចទំនាក់ទំនង ដើម្បីសុំការបំភ្លឺជុំវិញព័ត៌មាននេះបានទេ។
ប្រជាពលរដ្ឋម្នាក់កំពុងរស់នៅតំបន់ត្រពាំងក្រសាំង ដែលមិនហ៊ានបញ្ចេញឈ្មោះបានឲ្យដឹងថា នៅក្នុងដែនជម្រកសត្វព្រៃគូលែនព្រហ្មទេពនោះ កំពុងមានការកាប់ឈើជារៀងរាល់ថ្ងៃសម្រាប់រុករានយកដីធ្វើ កម្មសិទ្ធិឯកជន និងមានម៉ាស៊ីនអារឈើខុសច្បាប់ ដើម្បីយកទៅលក់ដូរផង ៖ "ទាហានពួកអី គេអារឈើម៉ាស៊ីនប្រហែល ៤-៥គ្រឿង រៀងរាល់ថ្ងៃ ប៉ះជួនណា (អារ) យប់ប៉ះជួនណាថ្ងៃនេះឯង។ ទើបតែស្ងាត់មិញនេះឯង ដឹកតាមរទេះគោ ជួនណាក៏ ១០រទេះ ជួនណាក៏ ៥រទេះជួនណាក៏ ៣រទេះ។ បើនៅច្រកឯកោះកូងនោះទៀតរាល់ថ្ងៃ"។
កាលពីពាក់កណ្ដាលខែធ្នូ ឆ្នាំ២០១០កន្លងមក លោក ហឿ អន ប្រធានសហគមន៍សាមគ្គីសង្គ្រោះព្រៃឈើ ភូមិអូរតាម៉េង ឃុំអន្លង់វែង ស្រុកអន្លង់វែង ខេត្តឧត្តរមានជ័យ ក៏ធ្លាប់បានសំដែងការព្រួយបារម្ភដែរថា ព្រៃដែលសហគមន៍របស់លោកការពារសម្រាប់លក់កាបូនព្រៃឈើជាច្រើន កំពុងទទួលរងការកាប់បំផ្លាញយ៉ាងខ្លាំង។
ប្រធានសហគមន៍ព្រៃឈើដដែល បានមានប្រសាសន៍ថា ក្រុមឈ្មួញកាប់ឈើខុសច្បាប់ បានប្រើម៉ាស៊ីនលាន់ឮទ្រហឹងពេញព្រៃ ប៉ុន្តែមិនមានការបង្ក្រាបពីមន្ត្រីជំនាញណាមួយទេ។
ដែនជម្រកសត្វព្រៃនៃឧទ្យានជាតិគូលែនព្រហ្មទេព មានផ្ទៃដីលាតសន្ធឹងតភ្ជាប់គ្នារាប់សិបគីឡូម៉ែត្រដោយផ្ទៃដី ព្រៃមួយផ្នែកស្ថិតក្នុងខេត្តព្រះវិហារ មួយផ្នែកស្ថិតនៅក្នុងស្រុកស្វាយលើ និងស្រុកវ៉ារិន ខេត្តសៀមរាប និងមួយផ្នែកភ្ជាប់ទៅតំបន់ព្រៃស្អាក ស្រុកអន្លង់វែង ខេត្តឧត្តរមានជ័យ៕