សម្លកង្កែបអាំង ម្ជូរម្កាក់
កង្កែបអាំង ម្ជូរម្កាក់គឺជាមុខម្ហូបមួយប្រភេទរបស់អ្នកឃុំគោកមន ស្រុកបន្ទាយអំពិលខេត្តឧត្ដរ មានជ័យ។ ម្ហូបនេះគេនិយមធ្វើទទួលទាននៅរដូវរំហើយដែលជារដូវច្រូតកាត់ ហើយកង្កែបក៏សំបូរ និង កំពុងតែឡើងឆ្ងាញ់ផងដែរនៅរដូវនេះ។ កង្កែបអាំង ម្ជូរម្កាក់គឺជាម្ហូបដែលមានឱជារសឈ្ងុយឆ្ងាញ់ និង មានប្រជាប្រិយភាពក្នុងចំណោមម្ហូបនៅស្រុកស្រែជាច្រើនទៀត។ ម្ហូបនេះដែរគឺជាម្ហូបដែលបានបញ្ជាក់ ពីអត្តសញ្ញាណរបស់ប្រជាកសិករនៅស្រុកបន្ទាយអំពិលដែលគាត់និយមធ្វើទទួលទានជាលក្ខណៈគ្រួសារ ហើយច្រើនតែធ្វើនៅឯស្រែគឺនៅពេលដែលគាត់ទៅប្រមូលផលស្រូវ ព្រោះនៅឯស្រែគាត់អាចរកកង្កែបបានយ៉ាងងាយដោយការដាក់ទ្រូ ឬលប (ដាក់នុយ ឬត្រីតូចៗដែលងាប់ចូលក្នុងទ្រូឬ លបដើម្បី ឲ្យកង្កែបចូលទៅស៊ី) នៅតាមថ្លុកក្នុងស្រែ ឬទីដែលមានទឹកដក់បន្តិចបន្តួចនៅក្នុងស្រែ ម្យ៉ាងទៀតគាត់ក៏ អាចជីករន្ធក្ដាមតាមវាលស្រែបានផងដែរ។
សម្រាប់ផ្លែម្កាក់គឺមិនមែនម្កាក់ដែលគេដាក់លក់នៅតាមទីផ្សារនោះទេ។ ម្កាក់ដែលដាក់លក់នៅ លើទីផ្សារមិនអាចយកមកស្លបានទេ។ ចំពោះសម្លនេះគឺគេយកម្កាក់ព្រៃ ដែលនៅក្នុងភូមិមិនមានផ្លែ ឬ ដើមរបស់វាឡើយ គឺមានតែនៅតាមព្រៃ និងនៅតាមវាលស្រែប៉ុណ្ណោះ។ សូមបញ្ជាក់ថាមិនមែនព្រៃ ឬ វាលស្រែទាំងអស់សុទ្ធតែមានដើមម្កាក់នោះទេ ព្រោះវាជាឈើដែលកម្រ ហើយមានមិនសូវសំបូរទេនៅ ស្រុកបន្ទាយអំពិល។ គ្រាន់តែបានឃើញឈ្មោះមុខម្ហូបនេះលោកអ្នកប្រាកដជាដឹងហើយថាផ្លែម្កាក់មាន រសជាតិយ៉ាងណា គឺវាមានរសជាតិជូរអែម។
- គ្រឿងផ្សំ
- កង្កែប
- ផ្លែម្កាក់
- ម្អម ឬម្រះព្រៅ(បើដាក់ម្អមមិនចាំបាច់ដាក់ម្រះព្រៅទេ)
- អំបិល
- ប៊ីចេង
- មើមខ្ទឹមស
- ស្លឹកគ្រៃ
- ប្រហុក (ដាក់បន្តិបន្តួចកុំឲ្យច្រើនពេក)
- វិធីធ្វើ
លាងឆ្នាំងឲ្យស្អាត រួចដាក់ដាំទឹក បន្ទាប់មកដំមើមខ្ទឹមសដាក់ចូល ហើយដាក់ផ្លែម្កាក់ និងស្លឹក គ្រៃចូលព្រមជាមួយគ្នាតែម្ដង រួចហើយដាក់អំបិលចូលបន្តិច រីឯម្អមត្រូវលាងទុកឲ្យស្អាត។
ចំណែកកង្កែបត្រូវវះយកអាចម៍ចេញ ហើយលាងឲ្យស្អាត រួចយកទៅដាក់អាំងឲ្យឆ្អិនល្មម តែកុំ ឆ្អិនពេក។ កង្កែបមិនត្រូវពន្លាត់យកស្បែកចេញទេ គឺត្រូវទុក ហើយដាក់អាំងទាំងស្បែក នៅពេលទឹកពុះ ត្រូវដាក់កង្កែបដែលអាំងឆ្អិនល្មមនោះចូល ហើយគ្របទុករហូតកង្កែបឆ្អិនល្អសឹមជ្រំប្រហុកដាក់ចូល បន្តិច រួចដាក់ប៊ីចេងចូលបន្តិច គ្របទុកមួយស្របក់ទើបបង់ម្អមដែលបានលាងសំអាតរួចរាល់ហើយ ដាក់ចូល បន្ទាប់ពីបង់ម្អមចូលហើយត្រូវគ្របទុកមួយសន្ទុះដើម្បីឲ្យម្អមស្លោកបន្តិច។ ភ្លក់មើល សាប ឬប្រៃត្រូវថែមថយទៅតាមចំណង់ចំណូលចិត្ត រួចហើយសឹមដាក់ចុះពីភ្លើងជាការស្រេច។ សម្រាប់ម្អម គេអាចរកដកបាននៅក្នុងស្រែ ឬនៅតាមទីកន្លែងដែលមានដើមម្អមដុះ ម្អមនេះដែរមានពីរប្រភេទ គឺ ម្អមក្ដាម និងម្អមស្រែ ហើយម្អមដែលយកមកបង់ក្នុងសម្លនេះគឺជាម្អមស្រែដែលមានក្លិនក្រអូបប្រហើរ។
បន្ទាប់ពីបានរៀបរាប់ខាងលើរួចមកឃើញថាមុខម្ហូបមួយនេះគឺជាម្ហូបដែលងាយស្រួលធ្វើ ហើយមានគ្រឿងផ្សំតិចទៀតផង អ្វីដែលពិសេសជាងនេះគឺវាមានឱជារសឈ្ងុយឆ្ងាញ់ បើបានទទួល ទានជួបជុំក្រុមគ្រួសារនៅក្រោមម្លប់ឈើក្នុងស្រែគឺពិតជាមានភាពកក់ក្ដៅ និងមានសុភមង្គលមែនទែន ស្របនឹងខ្យល់បក់នាំយកមកជាមួយនូវក្លិនដ៏ក្រអូបនៃផ្លែស្រូវធ្វើឲ្យសម្លកង្កែបអាំងម្ជូរម្កាក់មានឱជារស ឈ្ងុយឆ្ងាញ់ថែមមួយកម្រិតទៀត។
សូមបញ្ជាក់ថាម្ហូបមួយមុខនេះមិនមែនដកស្រង់ចេញពីសៀវភៅវិជ្ជាធ្វើម្ហូបណាមួយឡើយ គឺជា ការដកស្រង់ពាក្យសំដី និងបទពិសោធន៍ផ្ទាល់របស់ប្រជាកសិករមួយចំនួននៅក្នុងឃុំគោកមនដែលគាត់ ធ្លាប់បានឃើញបានស្គាល់ និងធ្លាប់បានធ្វើទទួលទាន៕
ចងក្រងដោយ៖ ផាត សុភឿន និស្សិតផ្នែកសំណង់ស៊ីវិល នៃសាកលវិទ្យាល័យអន្តរជាតិ