កំពតដីស្អិត

កំពតដីស្អិតជាប់ចិត្តខ្ញុំ        
ទេសភាពមានភ្នំស្រស់បំព្រង

បក្សាបក្សីហើរជាវ៉ូង           
 គូរស្នេហ៍អូនបងតាមមាត់ព្រែក។

អង្គុយមើលភ្នំអាសូរកាយ    
កំពូលខ្ពស់ឆ្ងាយបែកផ្សែងមេឃ

បានតែឈរមើលឃើញនិងភ្នែក   
ទឹកហូរតាមព្រែកកំប្លោកកៀន។

ខ្យល់បក់រំភើយត្រជាក់កាយ       
 ពេលព្រឹកមុនបាយឈរលើស្ពាន

កំពតម្ហូបឆ្ងាញ់សមុទ្រមាន           
 បង្កងត្រីចៀនមានគ្រប់មុខ។

កំពតដីសើមភ្លៀងរលឹម                 
ចាបហើរទៅភ្នំចូលសំបុក

អ្នកស្រែដកស្ទូងបែកដីភក់            
ចិនរែកនំលក់ដើររអិល។

កំពតដីចាស់សមុទ្រប្រៃ                
 ថៅកែដេញថ្លៃស្រែអំបិល

មានលុយមានឡានគេមិនខ្ជិល   
 វីឡាតុវិលក្លិនក្រអូប។

កំពតដីល្អដូចស្រែលើ                   
 សំបូរផ្លែឈើគួរចង់ហូប

ស្វាយល្មុតសេដាលក់គ្រប់តូប      
បុប្ផាក្រអូបនៅជិតបឹង។

អ្នកណាក៏ឃើញផ្កាក្រពុំ                 
បែកមែកសាយគុម្ពប្រាប់កុំខឹង

កំពតភ្លៀងធ្លាក់ខ្លាំងដ៏ម្លឹង            
 បេះដូងជាប់ផុងទៅមិនរួច៕

ប៉ាវ​ ចន្ទ្រា (គីមីវិទ្យា)
chantreapav@gmail.com