ខ្ញុំបាទឈ្មោះ នួន សីហា ជានិស្សិតនៃវិទ្យាស្ថានបច្ចេកវិទ្យានៃកម្ពុជា ឆ្នាំទី១ ផ្នែកសំណង់ស៊ីវិល សព្វថ្ងៃបានស្នាក់នៅក្នុងសមាគមនិស្សិតឧត្តរមានជ័យក្នុងរាជធានីភ្នំពេញ មូលហេតុដែលជំរុញឲ្យខ្ញុំមករស់នៅក្នុងសមាគមនេះព្រោះខ្ញុំបានយល់ច្បាស់ ពីគោលការណ៍ដ៏ល្អរបស់សមាគមដូចជា ជួយជំរុញឲ្យសិស្សក្រីក្រអោយមកបន្តការសិក្សានៅក្នុងទីក្រុងភ្នំពេញដោយប្រើប្រាស់ថវិកាតិចតួចបំផុត។ ផ្លាស់ប្ដូរភាពល្ងឹតល្ងង់ឲ្យមកជាមនុស្សឆ្លាតវៃមើលឃើញពីភាពភ្លឺស្វាង ក្នុងភពវិជ្ជាមានចេះសាមគ្គីគ្នាក្នុងដំបូលផ្ទះតែមួយ និងយល់ដឹងពីភាពសាមគ្គីគ្នាព្រមទាំងភាពតស៊ូព្យាយាមក្នុងជីវិត។
ដូចនេះ ក្នុងនាមជានិស្សិតជំនាន់មុន ខ្ញុំសូមផ្ដល់យោបល់ខ្លះៗ ដល់ប្អូនដែលត្រៀមប្រលងខាងមុខ និង ជិតបញ្ចប់សញ្ញាប័ត្រមធ្យមសិក្សាទុតិយភូមិនៅថ្ងៃខាងមុខនេះ ឲ្យមានគំនិតមកសិក្សាបន្តនៅទីក្រុងភ្នំពេញ ព្រោះទីក្រុងភ្នំពេញជាទីប្រជុំវិជ្ជាជីវៈជាច្រើនបែបច្រើនយ៉ាង ដែលយើងមិនធ្លាប់ស្គាល់ ជាពិសេសការមករស់នៅជាមួយសមាគមគឺជាជម្រើសដ៏ល្អបំផុតរបស់ប្អូនៗ ព្រោះសមាគមពួកយើង មានការអប់រំវិន័យ ការថែទាំ របៀបរបបរស់នៅជាក្រុម និង ការសិក្សាឲ្យមានកម្រិតខ្ពស់ ខុសប្លែកពីការរស់នៅខាងក្រៅជាមួយមិត្តភក្តិថ្មី ឬ ជាមួយបងប្អូនសាច់ញាតិ និងគ្មានការជំរុញឲ្យយើងរៀនសូត្រ ហើយអាចឈានទៅរកភាពភ្លើតភ្លើនក្នុងសង្គមខូចអនាគតជាមួយគ្រឿងញៀន រហូតបោះបង់ការសិក្សា។
ជាចុងក្រោយ ខ្ញុំមានពាក្យពេចន៍សំណូមពរ ទៅដល់សិស្សានុសិស្សទាំងអស់គួរត្រិះរិះពិចារណាឲ្យបានច្បាស់ដើម្បីអនាគត និងគ្រួសាររបស់ប្អូនៗកុំទុកឲ្យពេលវេលាកន្លងផុតទៅដោយគ្មានន័យ សូមគិតថាវិជ្ជាជាទ្រព្យក្នុងប្រាណដែលគ្មានអ្នកណាអាចលួចបាន៕