Monday, June 25, 2012
គ្រូបង្រៀននៅឧត្តរមានជ័យ ខានបើកប្រាក់តំបន់ដាច់ស្រយាល និងប្រាក់ធ្វើដំណើរ ៨ខែ
ភ្នំពេញ: សមាគមគ្រូបង្រៀនកម្ពុជាឯករាជ្យ បានផ្ញើលិខិតជូនលោក អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា សុំជួយអន្តរាគមន៍ចំពោះករណីមិនទាន់បើកប្រាក់តំបន់ដាច់ស្រយាលចំនួន ៨ខែ និងប្រាក់ធ្វើដំណើរចំនួន ៩ខែ។
យោងតាមលិខិតលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ នៅថ្ងៃទី២៥ ខែមិថុនា ឆ្នាំ២០១២ បានលើកឡើងថា លោកគ្រូអ្នកគ្រូដែលបង្រៀននៅស្រុកអន្លង់វែង ខេត្តឧត្តរមានជ័យ បានស្នើសុំឱ្យសមាគមជួយអន្តរាគមន៍ប្រាក់តំបន់ដាច់ស្រយាល និងប្រាក់ធ្វើដំណើរ ដែលមិនទាន់បានបើកអស់រយៈពេលជាង ៨ខែ។
លោក រ៉ុង ឈុន បានបញ្ជាក់ថា “ប្រាក់សម្រាប់គ្រូបង្រៀននៅតំបន់ដាច់ស្រយាល គឺមានចំនួន ៦០.០០០ រៀល ក្នុងមួយខែ និងប្រាក់ឧបត្ថម្ភធ្វើដំណើរសម្រាប់គ្រូបង្រៀនចំនួន ៤០០.០០០ រៀល នៅពេលចេញមកបម្រើការងារដំបូង”។
ប្រធានសមាគមរូបនេះបន្ថែមថា ចំពោះគ្រូបង្រៀននៅតំបន់ដាច់ស្រយាល គួរត្រូវបានលើកទឹកចិត្តពីក្រសួងអប់រំ មិនត្រូវមើលរំលងឡើយ។ តែដោយឡែក លោកគ្រូអ្នកគ្រូនៅខេត្តឧត្តរមានជ័យ ចាប់ពីខែតុលា ឆ្នាំ២០១១ រហូតមកដល់ខែមិថុនា ឆ្នាំ២០១២នេះ ពុំទាន់បានបើកប្រាក់តំបន់ដាច់ស្រយាល និងប្រាក់ឧបត្ថម្ភធ្វើដំណើរនៅឡើយ។
ចុងបញ្ចប់នៃលិខិតដាក់ជូនលោករដ្ឋមន្ត្រីក្រសួងអប់រំ បានបញ្ជាក់ថា “ការយឺតយ៉ាវក្នុងការបើកប្រាក់នេះ នាំឲ្យប៉ះពាល់ដល់ជីវភាពរស់នៅរបស់គ្រូបង្រៀន និងជាផ្នែកមួយដែលបណ្ដាលឲ្យគ្រូបង្រៀនផ្ទេរចេញ មិនអាចឈរជើងបង្រៀននៅតំបន់ដាច់ស្រយាលបាន”៕ K