ក្រុងសំរោង-ខេត្តឧត្តរមានជ័យ: ប្រជាពលរដ្ឋ ៥ នាក់ រងរបួស និងលំនៅដ្ឋានចំនូន ៦៥ ខ្នង ត្រូវបានបំផ្លាញដោយខ្យល់ព្យុះ រយៈពេលជិត ១ ម៉ោង កាលពីវេលាម៉ោង ៣ និង ៣០ នាទី រសៀលថ្ងៃទី១៩ ខែមេសា ឆ្នាំ២០១២ នៅក្នុងក្រុងសំរោង ខេត្តឧត្តរមានជ័យ។
ក្រោយហេតុការណ៍ខាងលើភ្លាមនោះ គេឃើញមានកម្លាំងអាជ្ញាធរខេត្ត និងក្រុងសំរោង ដឹកនាំកម្លាំងដោយលោក លៀម សុដា អភិបាលរងខេត្តឧត្តរមានជ័យ និងកញ្ញា ណាក់ ខាក់មល អភិបាលរងក្រុងសំរោង បានចុះត្រួតពិនិត្យជាក់ស្ដែង ការខូចខាតផ្ទះសម្បែង និងយកពលរដ្ឋទាំង ៥ នាក់ មកមណ្ឌលសុខភាពបង្អែកខេត្តភ្លាមៗផងដែរ។
តាមរបាយការណ៍របស់កញ្ញា ណាក់ ខាក់មល អភិបាលរងក្រុង បានបញ្ជាក់ថា ក្នុងឧបត្តិហេតុខ្យល់ព្យុះនេះ បណ្ដាលឲ្យប្រជាពលរដ្ឋចំនួន ៥ នាក់ រងរបួស។ ក្នុងនោះ មានស្ត្រីម្នាក់ រងរបួសធ្ងន់។ ចំណែកផ្ទះត្រូវខូចខាតអស់ចំនួន ៦៥ ខ្នង។ ក្នុងនោះខូចខាតទាំងស្រុងចំនួន ១២ ខ្នង និងប៉ើងដំបូលអស់ចំនូន ៥៣ ខ្នង ហើយខូចខាតគោយន្តកន្ត្រៃអស់មួយគ្រឿងផងដែរ។
កញ្ញា ណាក់ ខាក់មល បានបញ្ជាក់បន្តទៀតថា ក្នុងចំណោមផ្ទះទាំង ៦៥ ខ្នងនោះ មានក្នុងភូមិសំរោង ប៉ើងដំបូលផ្ទះចំនួន ១៤ ខ្នង រួមទាំងដំបូលផ្សារ១ និងដំបូលហាងសាំង១។ ភូមិភ្នៀតចំនួន ៤៦ ខ្នងផ្ទះ ក្នុងនោះប៉ើងដំបូលចំនួន ៣៦ ខ្នង និងដួលរលំចំនួន១០ខ្នង។ ភូមិដូនកែន ចំនួន ៣ ខ្នង ក្នុងនោះប៉ើងដំបូលផ្ទះចំនួន ២ខ្នង និងដួលរលំ១ខ្នង។ ភូមិឈូក ១ខ្នង។ ភូមិត្របែក ១ ខ្នង ដួលរលំដែរ៕ S
