ផ្សារសំរោង
និពន្ធដោយ នី វណ្ណដា
ផ្សារសំរោងមានទីតាំងស្ថិតនៅ ភូមិសំរោង សង្កាត់សំរោង ក្រុងសំរោង ខេត្តឧត្តរមានជ័យ។ ផ្សារនេះបានកសាងឡើងមុន ឆ្នាំ១៩៨០ ដែលកាលនោះមានតូបលក់ ប្រមាណតែ ១០ ទៅ ២០ តូបប៉ុណ្ណោះ ហើយក៏ពុំមានផលិតផលគ្រប់គ្រាន់សម្រាប់ផ្គត់ផ្គង់ដល់ អ្នកស្រុកតំបន់នោះដែរ ព្រោះកាលនោះ តំបន់នេះជាតំបន់សង្គ្រាម។ នៅឆ្នាំ១៩៨៨ ផ្សារ សំរោងត្រូវបានអគ្គីភ័យឆាបឆេះអស់គ្មានសល់ ដែលធ្វើអោយប៉ះពាល់យ៉ាងខ្លាំងដល់ជីវភាពអាជីវករ និងអ្នកនៅជុំវិញផ្សារ ដោយអគ្គីភ័យបានលេបត្របាក់ទ្រព្យសម្បត្តិអស់គ្មានសល់។ បន្ទាប់ពីអគ្គីភ័យបានឆាបឆេះ ផ្សារនេះមិនត្រូវបានរៀបចំឡើងវិញដោយក្រុមហ៊ុន ឬ អាជ្ញាធរ ណាមួយឡើយ ប៉ុន្តែមានគណៈកម្មការមួយ ដែលបានរៀបចំ បែងចែកដី ហើយអាជីវករត្រូវ បង់លុយថ្លៃដីនឹងធ្វើតូបលក់ដូរដោយខ្លួនឯង។ ផ្សារសំរោងកាន់តែមានតូបច្រើនឡើងៗ រហូត ដល់ឆ្នាំ២០០២ ផ្សារនេះត្រូវបានរុះរើដើម្បីសាងសង់ជាថ្មី ដើម្បីសម្រួលដល់ការធ្វើអាជីវកម្ម របស់អាជីវករនៅក្នុងផ្សារសំរោង។ នៅឆ្នាំ ២០០៣ ផ្សារនេះត្រូវបានកសាងរួចរាល់ជាស្ថាពរ ហើយបើកឲ្យមានការលក់ដូរជាធម្មតាវិញ ដែលមានតូបប្រមាណជាង ២៥០ តូប ដែលមាន លក់ទំនិញស្ទើរគ្រប់ ប្រភេទ ប៉ុន្តែជាងពាក់កណ្ដាលនៃអាជីវករជាអ្នកលក់ខោអាវ និងឥវ៉ាន់ចាប់ ហួយ។ ចំពោះអាជីវករដែលលក់ចាប់ហួយ ពួកគាត់មានលក្ខណៈ ពិសេសម្យ៉ាងដែលគួរឲ្យ កត់សំគាល់ គឺពួកគាត់លក់ទំនិញគ្រប់ ប្រភេទទៅតាមរដូវ កាលដូចជា មង សំណាញ់ កាំបិទ ពូថៅ គ្រាប់ ពូជដំណាំ គ្រឿងទេស និង សម្ភារៈប្រើប្រាស់ប្រចាំថ្ងៃមួយចំនួនទៀត។ ត្រង់ចំនុច នេះ សបញ្ជាក់ឲ្យឃើញពីគំនិតនៃការធ្វើអាជីវកម្មរបស់ពួកគាត់ ដែលចេះស្វែងរកទំនិញដើម្បី ផ្គត់ផ្គង់ដល់អតិថិជន ព្រោះនៅទីនោះមានអតិថិជនមិនជាច្រើនណាស់ណានោះទេ ហើយ ពួកគេភាគច្រើនជាកសិករ ប្រកបរបរកសិកម្ម។ ដូច្នេះអាជីវករ ពឹងផ្អែកទាំងស្រុងទៅលើ កសិករ បើកសិករបង្កបង្កើនផលបានទិន្នផលខ្ពស់ នោះអាជីវករក៏អាចលក់ផលិតផលរបស់ ខ្លួនបានច្រើនទៅតាមនោះដែរ។ ចំពោះទំនិញដែលនាំយកមកលក់ក្នុងផ្សារ នេះភាគច្រើននាំ យកមកពីខេត្តបន្ទាយមានជ័យ ដែលជាផលិតផលនាំចូលពីប្រទេសថៃ ចំណែកផលិតផល មួយចំនួនទៀតនាំចូលពីប្រទេសថៃ តាមច្រកព្រំដែនអន្តរជាតិអូរស្មាច់ ដែលស្ថិតនៅក្នុង ខេត្តឧត្តរមានជ័យតែម្ដង។ ដោយឡែកចំពោះខោអាវភាគច្រើន គឺនាំយកមកពីរាជធានីភ្នំពេញ ដែលជា ផលិតផលក្នុងស្រុក និង ជាផលិតផលរបស់ប្រទេសវៀតណាម។ អាជីវករអាច លក់ផលិតផលរបស់ខ្លួនបានប្រមាណជាមធ្យម ២០ម៉ឺន រៀលក្នុងមួយថ្ងៃ៕