យើងខ្ញុំជានិស្សិតខេត្តឧត្តរមានជ័យ
សូមចូលរួមអបអរសាទរ
លោក ខូ តារាឫទ្ធិ ជាស្ថានិក និងជាសមាជិកក្រុមប្រឹក្សាភិបាលនៃសមាគមនិស្សិតឧត្តរមានជ័យដែលបានជាប់ពានរង្វាន់ធំប្រចាំតំបន់អាស៊ីអាគ្នេយ៍នៅប្រទេសថៃ
ហើយលោកជាអ្នកនិពន្ធ និងជាសមាជិកក្រុមប្រឹក្សាភិបាលនៃសមាគម
ប៊ិច កម្ពុជា ផងដែរ។
កាលពីថ្ងៃច័ន្ទ ទី ១៤ ខែធ្នូ ឆ្នាំ
២០១៥ លោកត្រូវបានគណកម្មការពានរង្វាន់តំបន់អាស៊ីអាគ្នេយ៍ជ្រើសរើសផ្តល់រង្វាន់ប្រចាំតំបន់សម្រាប់ឆ្នាំ២០១៥
ចំពោះវណ្ណកម្មរបស់លោកដែលសំបូរទៅដោយរឿងប្រលោមលោកខ្លី
និង កំណាព្យ
ហើយនឹងកិច្ចការរបស់លោកក្នុងការដឹកនាំលើកកំពស់វិស័យអក្សរសាស្ត្រ/អក្សរសិល្ប៍នៅកម្ពុជាតាំងពីចុងទសវត្សឆ្នាំ១៩៩០មក។
ស្នាដៃចុងក្រោយមួយរបស់លោកដែលគេជ្រើសរើស
មកបកប្រែទៅជាភាសាអង់គ្លេស
និងយកធ្វើជាវណ្ណកម្មផ្តល់រង្វាន់គឺជារឿងខ្លីមួយមានចំណងជើងថា“អាម៉ាស់”ដែលឆ្លុះបញ្ចាំងអំពីស្ថានភាពពុករលួយនៅកម្ពុជានាពេលបច្ចុប្បន្ន។
ក្នុងនោះលោកបានបញ្ចប់សេចក្តីរឿងថា
“….មនុស្សខ្មែរ មន្ត្រីខ្មែរម្នាក់ៗសុទ្ធតែមានហេតុផលក្នុងការប្រព្រឹត្តអំពើពុករលួយ។
នោះជាផ្លូវដែលពួកគេជ្រើសរើសសម្រាប់ដើរ។
សង្ឃឹមថា ជនជាតិខ្មែរ ពិសេសយុវជនខ្មែរដែលបានអានសៀវភៅនេះ
នឹងជ្រើសរើសផ្លូវថ្មីមួយសម្រាប់ដើរបើគិតថាវាចាំបាច់”។
នេះជាយុគ្គសម័យមាសរបស់
សមាគម ប៊ិច កម្ពុជា ដែលមានបេក្ខជនរបស់ខ្លួនបីរូបបានជាប់ពានរង្វាន់ប្រចាំតំបន់អាស៊ីអាគ្នេយ៍ប្រចាំ២០១៤
និង ២០១៥។
សព្វថ្ងៃនេះនិស្សិតឧត្តរមានជ័យ
ដែលកំពុងស្នាក់នៅក្នុងអន្តេវាសិកដ្ឋានរបស់សមាគមនិស្សិតឧត្តរមានជ័យក៏កំពុងបន្តការសរសេរកំណាព្យ
និងអត្ថបទផ្សេងៗដែរ
សង្ឃឹមថានិស្សិតឧត្តរមានជ័យជំនាន់ក្រោយលោក
នឹងទទួលបានពានរង្វាន់នេះផងដែរទៅថ្ងៃអនាគត៕៚