ឱស្រុកខ្មែរអើយ មិនគួរសោះឡើយ
ត្រូវគេរត់ចោល គេភ្លេចកំណើត
ភ្លេចវង្សត្រកូល ស្រុកខ្មែរទាំងមូល
គេលែងនឹកនា។
សម័យឥឡូវ បើគិតមើលទៅ
គេចាយដុលា ភ្លេចអស់ប្រាក់ខ្មែរ
ពីកេរ្ដិ៍ដូនតា ឥឡូវហ៊ឺហា
ដុលាពេញដៃ។
បើគ្មានដុល្លា ព្រោះគេគិតថា
រស់មិនប្រពៃ គ្មានភាពឡូយឆាយ
ក្នុងខ្លួនស្រាលដៃ របស់ប្រើថ្លៃ
មិនល្អដូចគេ។
អ្នកចេះភាគធំ យកលុយជាធំ
មិនគិតជាតិទេ គេលក់ចំណេះ
ទៅរស់ស្រុកគេ ដោយគិតឃើញតែ
លុយប្រាក់ដុល្លា។
អ្នកចេះខ្លាំងអស់ សល់អ្នកចេះស្មោះ
ព្រោះខ្សោយវិជ្ជា អ្នកចេះគេទៅ
រស់នៅធូធា អ្នកខ្សោយបែរជា
នៅក្នុងប្រទេស។
ជាតិគេគិតថា អ្នកចេះខ្លាំងខ្លា
ឲ្យចូលប្រទេស ឧបថម្ភគ្រប់យ៉ាង
គិតត្រង់មិនវេស ដើម្បីជាតិទេស
គេរីកចម្រើន។
ចំណែកស្រុកខ្មែរ គ្មានអ្វីប្រួលប្រែ
អ្នកចេះធំកើន ព្រោះតែជាតិទេស
មិនលើកតម្កើង អ្នកចេះរត់ប៉ើង
ឲ្យខ្មែរខ្សត់ខ្សោយ។
ត្រង់នេះគួរគិ ឲ្យមានគំនិត
ចូរកុំបណ្ដោយ គិតជាតិជាធំ
ទើបសមខ្មែរអើយ គ្មានអ្នកណាឡើយ
ស្រង់ជាតិយើងទេ៕
 |
| ចិន
ភ្នី (គី មីវិទ្យា) E-mail: chinpny@gmail.com |