ដែនដីស្រុកស្រែ ទឹកស្អាតមានតែ
អណ្ដូងយួដៃ អ្នកស្រុកអ្នកភូមិ
សប្បាយពេកក្រៃ ដោយសាររាល់ថ្ងៃ
មានទឹកប្រើប្រាស់។
បានទឹកនេះឯង អ្នកភូមិចាត់ចែង
ទាំងក្មេងទាំងចាស់ ឲ្យបានគ្រប់គ្នា
គ្មានចន្លោះខ្វះ មានទឹកប្រើបា្រស់
គ្រប់ភូមិឃុំស្រុក។
ងារជាអណ្ដូង ប្រៀបដូចជាទង
ដែលផ្ដល់ក្ដីសុខ ដល់អ្នកគ្រប់គ្នា
មិនរា សំរុក ដើម្បីក្ដីសុខ
អ្នកភូមិប្រជា។
គេដងរាល់ថ្ងៃ គ្មានទុក្ខព្រួយភ័យ
លៃបានគ្រប់គ្នា មានទាំងធុងតូច
ធុងធំមិនរា ឲ្យតែប្រជា
មានក្ដីសប្បាយ។
រាងក៏មិនសូវ ធំក៏មិនជ្រៅ
តែមានទឹកសាយ បំរើអ្នកភូមិ
មិនខ្លាចនឿយកាយ មិនភ័យខ្ចាត់ខ្ចាយ
អន្តរាយអាត្មា។
ព្រោះខ្លួនកើតមក មានវាសនាជោគ
ជាទី ប្រឹក្សា ជំនិតអ្នកភូមិ
ដោះស្រាយបញ្ហា ជំនួយប្រជា
វេលាទុរ្ភិក្ស។
អ្នកភូមិប្រជា សប្បាយគ្រប់គ្នា
ព្រោះ ភូមិមានទឹក ប្រើប្រាស់ស្រោចស្រប់
ភោគផលល្ងាចព្រឹក យើងត្រូវគិតនឹក
ទឹកដែលបានជួយ។
ដូចនេះយើងត្រូវ រក្សាឲ្យនៅ
កុំមានទុក្ខព្រួយ ព្រោះគុណ ទឹកនេះ
ប្រៀបដូចជាត្រួយ ដូចត្បូងពេជ្រមួយ
ដែលមានតម្លៃ។
បើយើងប្រើប្រាស់ គួរលៃទុកខ្លះ
សន្សំសំចៃ នូវប្រភពទឹក
អណ្ដូងយួដៃ ដែលមានសព្វថ្ងៃ
គង់វង្សប្រពៃ។
ខ្ញុំសូមអគុណ រំពៃទុកមុន
ទឹកចិត្តថ្លាថ្លៃ ព្រោះប្រយោជន៍រួម
ធំធេងពេកក្រៃ ត្រូវចេះកែច្នៃ
ឲ្យបានប្រសើរ៕
 |
| ស្ងាម ក្រឹម (រូបវិទ្យា) sngamkroem@gmail.com |