ឈ្មោះជានិស្សិត នេះជារឿងពិត
មិនមែនស្រម៉ៃ ឈ្លាតរៀនពេលយប់
ធ្វើការពេលថ្ងៃ ដើម្បីកម្រៃ
ផ្គត់ផ្គង់សិក្សា។
ពេលព្រឺកព្រលឹម គេតែងញញឹម
ទឹកមុខស្រស់ថ្លា ខុសប្លែកតែខ្ញុំ
ខុសឆ្ងាយម្លេះណា គេទៅសិក្សា
ឯងធ្វើសំណង់។
ធ្វើជាកម្មករ ខំទាំងត្រដរ
ចិត្តមិនអែអង់ ក៏ព្រោះខ្លួនអត់
ប្រឹងធ្វើសំណង់ ដឹងហត់ក៏ចង់
ឲ្យតែបានប្រាក់។
ធ្វើកម្មករគេ គេស្ដីគេជេរ
ចិត្តមិនអួលអាក់ ឮគិតតូចចិត្ត
ទ្រាំងធ្វើថ្លង់ខ្វាក់ ដើម្បីជាធ្នាក់
ផ្លូវទៅអនា-។
ពេលឃើញមិត្តភក្តិ ទឹកមុខប្រែធ្លាក់
តូចចិត្តម្លេះណា គេជួបជុំគ្នា
សប្បាយខ្ញៀវខ្ញា ក្រៅពីសិក្សា
គេលំហែរកាយ។
ពេលគេគ្រប់គ្រាន់ រៀនចូលចាប់ទាន់
ចិត្តក៏សប្បាយ ចំណែករូបខ្ញុំ
អារម្មណ៍ខ្វល់ខ្វាយ ហត់ទាំងចិត្តកាយ
រៀនក៏ពុំចេះ។
ញើសជោគពេញប្រាណ មានក្លិនរំខាន
ជាប់ក្លិនឆ្អាបឆ្អេះ គ្មានអ្នកចង់ក្បែរ
ហេតុអ្វីដូចច្នេះ? ម្ដេចក៏ជាតិនេះ
លោកឥតប្រណី។
ថ្ងៃនេះលំបាក ជីវិតតោកយាក
ថ្ងៃអាប់រស្មី សង្ឃឹមថ្ងៃស្អែក
គឺជាថ្ងៃថ្មី ដែលមានរស្មី
បំភ្លឺរូបខ្ញុំ៕
 |
| សែម ហឹម E-mail: heomsem@gmail.com |