រូបរាងមិនស្អាត តែខំសង្វាត
ដើម្បីម្ចាស់ថ្លៃ ស៊ូមិនខ្លាចក្ដៅ
ទាំងយប់ទាំងថ្ងៃ ជួយអ្នកពេកក្រៃ
ព្រោះតែខ្លួនស្មោះ។
ម្ចាស់ប្រើមិនឈប់ ទាំងយប់ព្រលប់
គ្រប់ពេលទាំងអស់ មិនបោះបង់ទេ
ម្ចាស់ធ្លាប់ស្រណោះ មិនដែលគិតសោះ
ថាក្បត់ម្ចាស់ខ្លួន។
តែងជួយគ្រប់គ្រា គ្រប់ទីនានា
មិនលាក់បំពួន បានឆ្អែតគ្រប់គ្នា
វេលាសមសួន ស្រេចលើម្ចាស់ខ្លួន
ជាអ្នកបញ្ជា។
ពេលខ្លះគិតថា រូបខ្លួននេះណា
វាសនាល្អជា ព្រោះថារូបខ្លួន
ត្រូវគេការពារ លើលោកនានា
ឆ្នាំងតែងនាំមុខ។
ព្រោះបើគ្មានខ្លួន ឃ្លានដាច់ពោះកូន
ច្បាស់ជាមានទុក្ខ បើមិនដោះស្រាយ
យកបាយនាំមុខ ក្រពះធ្វើទុក្ខ
ខាតបង់ការងារ។
តែពេលខ្លះវិញ ម្ចាស់ក៏មិនពេញ
ព្រោះខ្លួនមិនជា ពេលដែលខ្លួនចាស់
គេលែងនឹកនា ខ្លួនពិតកំព្រា
ព្រោះគេលែងប្រើ។
អាសូរខ្លួនដែរ គេមិនទុកថែ
អស់ទាំងផ្លូវដើរ លែងទុកខ្លួនជិត
ជំនិតបំរើ គេលែងសរសើរ
ព្រោះមានឆ្នាំងថ្មី៕