ឧត្តរមានជ័យ ៖ ជនរងគ្រោះចំនួន២នាក់ឡើងទៅកាប់ឈើគ្រញូងនៅតាមព្រំដែនកម្ពុជា-ថៃ នោះត្រូវក្រុមទាហានឈុតខ្មៅថៃបាញ់សម្លាប់រហូតមកដល់ថ្ងៃទី ០៣ ខែ កុម្ភៈ ឆ្នាំ ២០១២នេះមិនទាន់បញ្ជូនសពមកវិញនោះទេ។
ហេតុការណ៍ក្រុមទាហានថៃបាញ់សម្លាប់ពលរដ្ឋខ្មែរ នោះបានកើតឡើងកាលពីថ្ងៃទី ២៩ ខែ មករា ឆ្នាំ ២០១២ នៅចំណុចចំបក់កោង ស្ថិតក្នុងឃុំ អូរស្វាយ ស្រុក ត្រពាំងប្រាសាទ ខេត្ត ឧត្តរមានជ័យ។
ក្រុមគ្រួសារក៏ដូចអ្នករួចជីវិត បានឲ្យកម្ពុជាថ្មីដឹងថា កាលដែលប្ដីរបស់គាត់ឡើងទៅកាប់ឈើគ្រញូងនៅតាមព្រំដែននោះ ដោយក្រខ្លាំងពេក ទើបនាំគ្នាទៅកាប់ឈើគ្រញូងយកមកលក់ចិញ្ចឹមជីវិតក្រោយពីប្រមូលផលស្រូវរួចនោះ ហើយប្ដីរបស់គាត់បានចេញទៅផ្ទះនោះ នៅថ្ងៃទី២៨ ខែ មករា ឆ្នាំ ២០១២ ស្រាប់តែដល់ថ្ងៃទី ២៩ ខែ ដដែល មានគេមកប្រាប់ថា ប្ដីរបស់គាត់ត្រូវទាហានថៃបាញ់សម្លាប់។
ជនរងគ្រោះដែលត្រូវទាហានថៃបាញ់សម្លាប់នោះទី១. ឈ្មោះ ផេន ធួន ភេទប្រុស អាយុ ៣៨ឆ្នាំ ប្រពន្ធឈ្មោះ លុច ស្រៀន ភេទស្រី អាយុ ៣៦ឆ្នាំ មានកូនចំនួន៤នាក់ ស្រី២នាក់ ប្រុស២នាក់ មានទីលំនៅ ភូមិ អូរល្ហុង ឃុំ អូរស្វាយ ស្រុក ត្រពាំងប្រាសាទ ខេត្ត ឧត្តរមានជ័យ មុខរបរធ្វើស្រែចំការ ទី២. ឈ្មោះ គុង សំណាង ភេទប្រុស អាយុ ២៣ឆ្នាំ ប្រពន្ធឈ្មោះ ហំ លុននី ភេទស្រីអាយុ ២៣ឆ្នាំ មានកូនចំនួន២នាក់ រស់នៅភូមិ ពាម ក្នុងឃុំ អូរស្វាយ ស្រុក ត្រពាំងប្រាសាទ ខេត្ត ឧត្តរមានជ័យ មុខរបរធ្វើចំការ។
នៅពេលបច្ចុប្បន្នក្រុមគ្រួសារជនរងគ្រោះទាំង២នាក់កំពុងរង់ចាំថៃបញ្ជូនសាកសពប្ដីមកស្រុកវិញដើម្បីយកមកធ្វើបុណ្យទៅតាមប្រពៃណី៕
ចាន់ធី