ដើមក្បុក
ដោយ ហោន ចន្រ្ទា
ក្បុក គឺជាដើមរុក្ខជាតិមួយប្រភេទ ដែលផ្ដល់ប្រយោជន៍មួយចំនួនដល់មនុស្សគ្រប់ៗរូប។ ក្បុកមានពីរប្រភេទ ក្បុកធម្មតា និងក្បុកកន្ទុយគោ តែវាមានដើមធំជាង និង ស្លឹកល្អិតជាងក្បុកធម្មតា ឯទ្រង់ទ្រាយដទៃទៀតប្រហាក់ប្រហែលគ្នា។ ដើមរុក្ខជាតិនេះគឺដុះនៅរដូវវស្សា ហើយភាគច្រើនដុះនៅតាមតំបន់ដីសើម។ ត្បិតតែដើមវាមិនសូវជារឹងមាំប៉ុន្តែដើមនេះធន់នឹងកម្ដៅថ្ងៃណាស់។ ដើមវាតូចៗដែលមានប្រវែងប្រហែលជាកន្លះម៉ែត្រ ចំណែកស្លឹកវាមាន៣មែកធាងដុះនៅទីចុងបំផុតនៃដើម។ ប្រជាជនយើងអាច យកវាមកធ្វើជា បន្លែសម្ល (ដូចជា សម្លខ្ទិះ ម្ជូរ) ស្ងោអន្លក់ បបរបាយជ្រូកនិង ធ្វើអ្វីផ្សេងៗទៀតទៅតាមតម្រូវការរបស់ពួកគេ។ ដើមរបស់វាមានពណ៌ក្រឡាប៉ារ៉ា ស ខ្មៅ ប្រផេះបៃតង ហើយពេលយើងយកវាមកបរិភោគគឺយើងត្រូវបកសំបកពីដើមវាចេញសិន ទើបអាចយកទៅស្ងោរឬស្លបាន ប៉ុន្តែបើសិនវាមានចេញ ផ្កាឬផ្លែរួចហើយនោះយើងមិនអាចយកដើមនេះទៅបរិភោគបាននោះទេ ព្រោះដើមវាចាស់ ហើយរឹងថែមទៀត។ ដើមនេះមិនពិបាកស្វែងរកនោះទេ ព្រោះវាសំបូរណាស់នៅតាមព្រៃ ហើយយើងក៏អាចទិញវាបាននៅតាមទីផ្សារមួយចំនួនបានដែរ៕
