នាមជានិស្សិត រៀនដើររៀនគិត
រៀនគូសរៀនវាស់ រៀនធ្វើអោយល្អ
ទឹកប៊ិកថ្លៃណាស់ ចេះយល់អោយច្បាស់
ទើបឈ្នះសត្រូវ។
នាមជានិស្សិត ដាក់កាយផ្តោតចិត្ត
សរសេរនាំផ្លូវ កុំវង្វេងជាតិ
ឃើញខុសថាត្រូវ ពេលដល់សក់ស្កូវ
ទើបស្តាយត្រនំ។
នាមជានិស្សិត ទឹកប៊ិកមានពិត
កុំធ្វើបង្ខំ នាំអោយក្មេងក្រោយ
គ្នាយល់ច្រឡំ ឃើញរុយថាឃ្មុំ
វង្វេងស្មារតី។
នាមជានិស្សិត គោរពពាក្យពិត
កុំចាញ់សំដី នាំខូចកេរ្តិ៍ឈ្មោះ
អាប់អោនដល់ដី កូនប្រុសរឺស្រី
ត្រូវយល់អោយជ្រៅ។
នាមជានិស្សិត ឃ្លាតឆ្ងាយផ្ទះពិត
អាណិតម៉ែឪ គាត់ខំធ្វើការ
រិះរកគ្រប់ផ្លូវ អោយកូនរៀនទៅ
ស៊ូទ្រាំម្នាក់ឯង។
នាមជានិស្សិត ជៀសវាងអោយផុត
ស្រាស្រីញៀនល្បែង កុំអោយគេដៀល
រៀនតាំងពីក្មេង ដល់ធំវង្វេង
ឆ្គួតព្រោះតណ្ហា។
នាមជានិស្សិត ប៊ិកសៀវភៅពិត
ត្រូវចេះកត់ត្រា ចងក្រងចំណាំ
ទើបវាប្រជា យើងរួមដៃគ្នា
ការពារទឹកដី៕៚