នាដីស្រុកស្រែ ក្នុងព្រៃឃើញតែ
ស្លឹកឈើខៀវខ្ចី មានដើមតូចធំ
ផ្លែច្រើនពេកក្រៃ ខ្លះទុំខ្លះខ្ចី
គ្រប់ប្រភេទផ្លែ។
មានខ្លះញ៉ាំកើត ខ្លះក៏មិនកើត
តាមប្រភេទដែរ ឯខ្លះក៏ពុល
ខ្លះទៀតគ្រាន់តែ ល្អត្រឹមតែផ្លែ
បានតែសម្រស់។
ផ្លែដែលយើងញ៉ាំ មានគ្រប់ប្រចាំ
ក្នុងព្រៃទាំងអស់ មានទាំងផ្លែជូ
ផ្អែមចត់ល្វីងខ្សោះ គ្រប់រសទាំងអស់
គួរចង់ពិសា។
យើងឃើញកកោះ បញ្ចេញសម្រស់
បង្អួតផ្លែផ្កា ក្រឡាញ់បេងគុយ
បញ្ចេញវាចា កេះឆ្ងាញ់អស្ចារ្យ
ប្រហារគ្រប់គ្នា។
កន្ទួតព្រៃខឹង ពង្រខំប្រឹង
អួតដាក់ពុទ្រា អំពិលមិនចាញ់
ប្រមាញ់ផ្លែល្វា សេមាន់កំព្រា
ព្រោះសៅម៉ៅប្រែ។
ព្រីងប្រឹងបញ្ចេញ រំដួលនោះវិញ
ក៏មិនអន់ដែរ ក្រសាំងជូពេក
មែកភ្លូពេញផ្លែ ចំបក់ផងដែរ
ផ្លែស្ទើរបាក់មែក។
ល្មុតមង្ឃុតសេដា ម្នាស់ក៏អស្ចារ្យ
ខ្នុរបន្លាពេក ធុរ៉េនមិនចាញ់
បន្លាដូចដែក រីឯផ្លែចេក
ឆ្ងុយឆ្ងាញ់ត្រជាក់។
ទន្លាប់លឿងទុំ ម៉ាក់ប្រេងប្រជុំ
ម៉ាក់ប្រាំងបញ្ជាក់ ល្មុតផ្អែមដូចស្ករ
មៀនក៏មិនលាក់ ត្នោតក្រអូបជាក់
ដូងឆ្ងុយពិសា។
ជម្ពូផ្អែមឆ្ងាញ់ ទឹកដោះគោចាញ់
បញ្ចេញវាចា ប្រាប់ទៅចន្ទី
ឲ្យជួយផងណា ត្រយឹងប្រាប់ថា
ខ្លួនឆ្ងាញ់ជាងគេ។
ស្ពឺជូប្រាកដ ស្រម៉ក៏ចត់
មិនចាញ់ថ្កោទេ ជន្លុះក៏ដូច
ប្រៀបដូចគ្នាដែរ តែត្របែកប្រែ
ព្រុសទុំពេញព្រៃ៕៚
 |
| ស្ងាម ក្រឹម (រូបវិទ្យា) sngamkroem@gmail.com |