កើតមកជាមនុស្ស ទោះស្រី ឬប្រុស
យើងកុំកែប្រែ ខ្លះស្រីទៅប្រុស
កើតមានហូហៃ ទោះខំកែប្រែ
នៅតែមិនដូច។
អ្នកខ្លះល្អស្អាត ខ្លះទៀតសង្វាត
ធ្វើឲ្យបាត់ខូច ពី រូបរាងដើម
ពីធំទៅតូច នៅតែមិនដូច
រាងដើមវាឡើយ។
មានខ្លះទៀតនោះ ខិតខំជំរោះ
ឲ្យបានរាងស្បើយ ពីខ្មៅទៅស
ល្អគួកៀកកើយ ប៉ុន្តែព្រះអើយ
រូបរាងកែសោះ។
ខ្លះតូចទាបខ្មៅ តែពេលកែទៅ
ដូចជាស្រស់បស់ ខ្លះទៀតមិនចេះ
តែបានសម្រស់ បើបានទាំងអស់
កាន់តែល្អក្រៃ។
ខ្លះខ្លួនអត់ចេះ អួតមានតម្រេះ
ឲ្យខ្លួនថ្លៃថ្លា តែធ្វើបែបនេះ
នាំកើតទុក្ខភ័យ ពេលដែលមានថ្ងៃ
នោះខ្លួនដឹងពិត។
បើពី ធម្មជាតិ កើតមកបែកឃ្លាត
នោះយើងត្រូវគិត រុករកបងប្អូន
សាច់ញាតិជុំជិត នោះទើបល្អពិត
ជួបជុំគ្រួសារ។
មានកន្លែងខ្លះ ល្អស្អាតស្រឡះ
គួរឲ្យប្រាថ្នា កន្លែងខ្លះវិញ
ដោយមនុស្សបង្កា បង្កើតផ្លែផ្កា
មានរីកក្រពុំ។
ដូចជាកន្លែង ល្អពិតជាក់ស្ដែង
នៅតាមព្រៃភ្នំ មានព្រៃស្ដុកក្រាស់
ឯដើមតូចធំ មានផ្លែខ្ចីទុំ
គួចង់នែបនិត។
ដោយមនុស្សកែប្រែ ខ្ចីទុំសុទ្ធតែ
សិប្បនិមិ្មត កែពីធម្មជាតិ
ឲ្យអស់ព្រៃពិត នេះដោយគំនិត
ប្រឌិតកែប្រែ។
យើងកុំប្រព្រឹត្ត ពីរឿងមានពិត
ធ្វើឲ្យប្រួលប្រែ ត្រូវចេះស្រឡាញ់
រក្សាខំថែ ទុកដាក់ផ្កាផ្លែ
នោះល្អប្រពៃ៕៚
ស្ងាម ក្រឹម