ដកស្រង់ពីគេហទំព័រ កម្ពុជាថ្មី
ឧត្ដរមានជ័យ ៖ កាលពីវេលាម៉ោង១២ថ្ងៃត្រង់នាថ្ងៃទី ១៨ ខែ សីហា ឆ្នាំ ២០១១ ប្រជាពលរដ្ឋមួយក្រុម ដែលមានគ្នាចំនួន ១៥នាក់បានធ្វើដំណើរតាមគោយន្តដែលស្ថិតនៅលើផ្លូវយុទ្ធសាស្ត្រ នៅត្រង់ចំណុចភូមិមួយរយប្រាំ(១០៥) ឃុំ ផ្នាវ ស្រុក ត្រពាំងប្រាសាទ ខេត្ត ឧត្ដរមានជ័យ។
ប្រជាពលរដ្ឋ១៥នាក់នោះធ្វើដំណើតឡើងទៅលើភ្នំ ដងរែក មានគោលបំណងដើម្បីរុករកឈើគ្រញូង ក៏ប៉ុន្តែ ត្រូវ ទាហានមួយក្រុមមានគ្នាចំនួន៣នាក់ ធ្វើដំណើរតាមម៉ូតូដោយឃាត់គោយន្តដឹកមនុស្សឲ្យវិលត្រឡប់មកភូមិវិញ។ ទាហានម្នាក់បានសូមមិនបញ្ចេញឈ្មោះ និង សូមមិនឲ្យគេបញ្ចេញអង្គភាព បានរៀបរាប់ប្រាប់កម្ពុជាថ្មីឲ្យដឹងថាកាលពីថ្ងៃទី ១៧ ខែ សីហា ឆ្នាំ ២០១១នេះ មានប្រជាពលរដ្ឋមួយក្រុមដែលរស់នៅក្នុងភូមិ១០៥ ដែលឡើងទៅលើភ្នំនោះកាលពីលើកមុនបានបាត់ខ្លួនអស់ចំនួន៤នាក់ ហើយទទួឡដំណឹងថា២នាក់បានវិលត្រឡប់មកផ្ទះវិញហើយៗ ពីរនាក់ទៀតមិនទាន់ដឹងថាស្លាប់ឬរស់នៅឡើយទេ ទើបពួកគាត់ធ្វើការហាមឃាត់ដម្បីការពារសន្តិសុខដល់ប្រជាពលរដ្ឋទៅផ្សង នឹងគ្រោះថ្នាក់ ដោយយកជីវិតដ៏មានតម្លៃទៅប្ដូរនឹងឈើគ្រញូងទាំងនោះ។
ក្រោយពីទាហានមួយក្រុមបានហាមឃាត់រួចរាល់ហើយបានរៀបរាប់ពី រឿងបាត់ខ្លួនកម្មករ អស់ចំនួន៤នាក់ កាលពីលេកមុន ទើបប្រជាពលរដ្ឋទាំងនោះមានការភិតភ័យវិលត្រឡប់មកផ្ទះវិញ ដោយមានការអរគុណដោយទឹកមុខរីករាយចំពោះទាហានទាំងបីនាក់ដែលបានផ្ដល់ដំណឹងដល់ ពួកគាត់ទាំងអស់គ្នា៕ ប៉ែននួន
