ខ្ញុំបាទឈ្មោះ ផាត សុភឿន ភេទ ប្រុស មានទីកន្លែងកំណើតនៅភូមិគោកស្វាយ ឃុំគោកមន ស្រុកបន្ទាយអំពិល ខេត្តឧត្តរមានជ័យ អតីតជាសិស្សនៃវិទ្យាល័យ ហ៊ុន សែនឧត្តរមានជ័យ។ បច្ចុប្បន្នជានិស្សិតនៃសាកលវិទ្យាល័យអន្តរជាតិ ជំនាញសំណង់ស៊ីវិល។ ខ្ញុំជានិស្សិតអាហាររូបករណ៍ សមេ្តចតេជោហ៊ុន សែន។
ការរស់នៅក្នុងទីក្រុងភ្នំពេញ ខ្ញុំបានស្នាក់នៅក្នុងសមាគមនិស្សិតឧត្តរមានជ័យ។ ពេលមកដល់ភ្នំពេញដំបូង ខ្ញុំមានអារម្មណ៍ឯកកោ និងភ័យខ្លាចជាខ្លាំងព្រោះភ្នំពេញធំណាស់ ហើយខ្ញុំមិនធ្លាប់ស្គាល់ភ្នំពេញសោះពីមុនមក ម្យ៉ាងទៀតសូម្បីតែសាច់ញាតិ ឬមិត្តភក្តិនៅទីក្រុងក៏គ្មានដែរ។ ប៉ុន្តែក្រោយមកទើបខ្ញុំដឹងថា ខ្លួនខ្ញុំមិនឯកកោទេ ព្រោះនៅទីក្រុងភ្នំពេញមានអ្នកឧត្តរមានជ័យជាច្រើនមកបន្តការសិក្សានៅទីនេះ ហើយអ្នកទាំងអស់នោះ ភាគច្រើនស្នាក់នៅក្នុងសមាគមជាមួយខ្ញុំដែរ។ បន្ថែមលើសនេះទៀត សមាគមបានអប់រំខ្ញុំ និងនិស្សិតឯទៀតៗ ឲ្យរស់នៅប្រកបដោយ មេត្តា ករុណា ស្មោះត្រង់ចំពោះគ្នា គោរពសិទ្ធិគ្នា.... ក្រៅពីនេះ និស្សិតគ្រប់រូបដែលរស់នៅក្រោមដំបូលសមាគមតែមួយ ត្រូវស្រឡាញ់រាប់អានគ្នាដូចជាបងប្អូន ទោះបីជាយើងមិនមែនជាបងប្អូនក៏ដោយ
យ៉ាងហោចណាស់ក៏យើងមានឈាមជ័រ ជាអ្នកឧត្តរមានជ័យដូចគ្នាដែរ។
លើសពីនេះ ទៅទៀតសមាគមបានធ្វើឲ្យខ្ញុំហ៊ានបញ្ចេញមតិ និងយោបល់ផ្ទាល់ខ្លួនរបស់ខ្ញុំ ស្តីពីបញ្ហាផ្សេងៗ ដែលមានក្នុងសមាគមដើម្បីកែលំអ និងអភិវឌ្ឍឲ្យរីកចំរើន ក្នុងពេលប្រជុំម្តងៗ។ ចំពោះការសិក្សានៅសាកលវិទ្យាល័យ គឺមានការប្រកួតប្រជែងច្រើន និស្សិតនៅទីក្រុង គេមានប្រៀបជាងនិស្សិតមកពីបណ្តាខេត្ត ព្រោះភ្នំពេញជាទីក្រុងពាណិជ្ជកម្ម ដូចនេះអី្វៗគ្រប់យ៉ាង គឺស្តុកក្នុងទីក្រុង មានទាំងបច្ចេកវិទ្យា ប្រព័ន្ធអ៊ីនធឺណិត កុំព្យូទ័រ ប្រព័ន្ធផ្សព្វផ្សាយព័ត៌មាន រោងចក្រឧស្សាហកម្មធំៗ ទីផ្សារការងារ ទាំងអស់នេះ គឺមាននៅតាមទីក្រុង ហេតុនេះហើយ ទើបចំណេះដឹងមានលក្ខណៈទូលំទូលាយជាងនៅតាមខេត្ត។ ដោយឡែកសម្រាប់និស្សិតមកពីខេត្តឧត្តរមានជ័យ ខាងផ្នែកបច្ចេកវិទ្យានៅមានកំរិតទាប ដូចជាការប្រើប្រាស់កុំព្យូទ័រ អ៊ីនធឺណិត អ៊ីមែល ភាគច្រើនគឺមិនចេះ ជាពិសេសភាសាបរទេស ព្រោះនៅឧត្តមសិក្សាភាគច្រើន យកភាសាអង់គ្លេសជាភាសាយាន។ បើយើងមិនចេះភាសាអង់គ្លេសទេ នោះជាផលវិបាកសម្រាប់ការសិក្សានៅសាកលវិទ្យាល័យ។ ខ្ញុំសូមលើកទឹកចិត្តប្អូនៗជំនាន់ក្រោយៗ ឲ្យខិតខំរៀនសូត្រឲ្យបានពូកែទាំងផ្នែក បច្ចេកវិទ្យា ភាសាអង់គ្លេស និងចំណេះដឹងទូទៅ ព្រោះកាលណាតែយើងពូកែពីថ្នាក់ក្រោមមក បើយើងចង់បន្តការសិក្សានៅថ្នាក់ឧត្ដមសិក្សាវាក៏មានភាពងាយស្រួលដែរ។ គួរបញ្ជាក់ផងដែរថា នៅឧត្តមសិក្សារាល់ឯកសារទាំងឡាយសុទ្ធសឹងតែជាភាសាអង់គ្លេស ហើយឯកសារភាគច្រើនយកចេញពីប្រព័ន្ធអ៊ីនធឺណិត។ បើអ្នកមានបំណងមកសិក្សានៅទីក្រុង តែអ្នកគ្មានសាច់ញាតិនៅទីនោះទេ ចូរអ្នកកុំអស់សង្ឃឹម អ្នកត្រូវចង់ចាំថាមានសមាគមនៅរង់ចាំណែនាំ និងប្រឹក្សាយោបល់ដល់អ្នក៕