សុំ

នេះ​ជា​ការ​​សុំ​           ពី​តូច​ដល់​ធំ​

សុំ​ឥត​ស្រាក​ស្រាន្ត​          សុំ​រស់​បាន​សុខ​

ស្រណុក​ស្រួល​ប្រាណ​     សុំ​គ្រប់​ទីឋាន​

គ្រប់​អ្វី​ទាំង​អស់។

អ្នក​ខ្លះ​សុំ​មាន​          សុំ​កុំ​ស្រេក​ឃ្លាន​

សុំ​ទាំង​សម្រស់​       ឲ្យ​មាន​រូប​ឆោម​

រួស​រាយ​ស្រស់​បស់​          សុំ​គ្រប់​ទាំង​អស់​

ទាំង​ប្រុស​ទាំង​ស្រី​។

មាន​ខ្លះ​ទៀត​នោះ​     សុំ​មាន​កេរ្តិ៍​ឈ្មោះ​

កិត្តិយស​ល្បាញ់​ល្បី​  ឲ្យ​គេ​ស្គាល់​ច្រើន​

ចម្រើន​ប្រ​ពៃ​           នោះ​ខ្លួន​ល្អ​ក្រៃ​

ប្រពៃ​កន្លង​។

ចំ​នែក​ខ្លះ​ទៀត​         សុំ​ល្បិច​កល់​ស្នៀត​

ចាក់​ចុច​ប្អូន​បង​        ឲ្យ​ទាស់​ទែង​គ្នា​

និង​អ្នក​ភូមិ​ផង​         អ្នក​ជាប់​របង​

សៅ​ហ្មង​រាល់​ថ្ងៃ​។

តែ​ខ្លះ​ទៀត​វិញ​         ក្នុង​ចិត្ត​ទោម្នេញ​

សុំ​គូរ​ប្រពៃ​              សុំ​មាន​ស្នេហា​

ដែល​ស្ម័គ្រ​ស្មោះ​ក្រៃ​        កុំ​មាន​ព្រួយ​ភ័យ​

ព្រាត់​ប្រាស់​ឈឺ​ផ្សា។

ប៉ុន្តែ​អ្នក​ខ្លះ​             សុំ​កុំ​ឲ្យ​ខ្វះ​

សុខ​គ្រប់​ប្រការ​        កុំ​មាន​ជម្ងឺ​

ឈឺ​ថ្កាត់​ផង​ណា​      សុំ​ឲ្យ​ទុក្ខា​

ចាក​ឆ្ងាយ​ពី​កាយ​។

អ្នក​ខ្លះ​សុំ​ឲ្យ​            កូន​ចៅ​ក្រោយ​ៗ​

សំបូរ​សប្បាយ​         ត្រជាក់​ត្រជុំ​

គ្រប់​ក្រុម​ទាំង​ឡាយ  ​       សុំ​ឲ្យ​ចាក​ឆ្ងាយ​

រីក​រាយ​ថ្កើង​ថ្កាន​។

សុំ​សុំ​សុំ​សុំ​             សុំ​ជួប​សុំ​ជុំ​

សុំ​មាន​សុំ​បាន​         សុំ​ល្អ​សុំ​ស្អាត​

គ្រប់​ជាតិ​គ្រប់​ឋាន​           សុំ​សុខ​សុំ​សាន្ដ​

សុំ​គង់​សុំ​វង្ស​៕