ខ្ញុំនៅជនបទ ក្នុងខេត្តកំសត់
ឈ្មោះក៏មិនល្បី ក្នុងភូមិរុងរឿង
ឃុំអំពិលនៃ ឧត្តរមានជ័យ
ខេត្តកំនើតខ្ញុំ។
ខ្ញុំសូមបរិយាយ សម្ដែងបកស្រាយ
ឲ្យបានសមរម្យ ប្រាប់ពីអន្លក់
រួមប្រមូលផ្ដុំ មានក្នុងភូមិខ្ញុំ
ប្រាប់អស់ញាតិមិត្ត។
ដែលមានតាំងពី ក្នុងព្រៃមួលមី
ដែលនៅឆ្ងាយជិត មិនថាក្នុងទឹក
លើគោកមានពិត លើភ្នំជុំជិត
អន្លក់គ្រប់សព្វ។
ជ្រេសនិងត្រួយស្ដៅ កាច់ប៉ះយកទៅ
លាយនិងផ្លែត្រប់ ក្របុកទាល់ល្ងៀង
ផ្ទៀងប្រហុកខ្ចប់ ភ្លេចប្ដីលៃចប់
ឆ្ងុយឆ្ងាញ់ពិសា។
ព្រលឹតរំចង់ ពួនក្នុងស្រះស្រង់
ស្នោរចេញត្រួយផ្កា ត្រសក់ឪឡឹក
ល្ពៅផ្លែត្រៀបត្រា ត្រឡាចផងណា
ផ្លែផ្ការពេញសួន។
ទំពាំងភ្លុះថ្មី សណ្ដែកផ្លែខ្ចី
ននងហំហួន ផាវែនក្នុងទឹក
រំលឹកត្រកួន ចង្វារទូកពូន
កំប៉ោកផ្កាថ្មី។
ច្រាច់លាស់ត្រសង ម្អមសូមអែបផង
ក្បែសន្ទូងខ្ចី ននោងចេញផ្លែ
លើចុងឬស្សី ត្រួយក៏លាស់ខ្ចី
បង្អួតត្រួយខ្នឹង។
ឯអង្គាដី បង្អួតត្រួយខ្ចី
ម្រះធ្វើមិនដឹង អង្កាញ់ត្រួយម្រុំ
ធ្វើដូចមិនខឹង តែត្រួយបាសនឹង
ខឹងឡើងពេញដើម។
ស្ពៃត្រូវទឹកថ្មី ចេញត្រួយសខ្ចី
ទទឹកជោគសើម ស្លឹកគ្រៃវិញនោះ
រងទឹកសន្សើម ស្លឹកជីចាប់ផ្ដើម
បញ្ចេញសម្រស់។
នេះជាអន្លក់ ចូរនាំ គ្នាភ្លក់
សុំកុំបង់បោះ ឲ្យគ្រប់រសជាតិ
ដែលមានទាំងអស់ រក្សាផងចុះ
កុំបំភ្លេចអី។
ខ្ញុំសូមអភ័យ នេះជាសំដី
ជាក្រៀមភាសា បើមិនត្រូវន័យ
អភ័យផងណា ព្រោះនេះគីជា
ភាសារដឺន៕៚
ស្ងាម ក្រឹម